KATUGNAW sa panahon. Lami kaayo magsuot og fur jacket, igsuon, sama sa mga langyaw nga makita nato sa mga salida.
Hello, diay kaninyo dinha. Maayong adlaw!
Niadtong 2011, natala ang pinakabugnaw nga temperatura sa Pilipinas sa 2 degree celcius sa Mt. Pulag, Luzon. Last January 19, 2019, 8.1 degree Celsius ang temperatura sa Baguio City nga hinungdan sa pagkadaut sa ubang pananum ug pagkalugi sa mga negusyante ug mag- uuma.
Matud pa sa Pagasa climatological record, ang pinakatugnaw nga temperaturang natala sa 6.3 degrees niadtong Enero 18, 1961. Nakapangurog na gani ang 14 degrees, unsa na lamang kaha nang ubos sa 10 degrees??? Grrrrrrrrrrrrrrrrrrr!
Bitaw, ambot lang kung miangay ang uban sa katugnaw sa panahon. Ako man god giganahan bisan walay nagapainit sa akong dughan ug wala pod mga gahing bukton nga makapyutan o mga paa nga matandayan (kay solo parent lagi). Siyempre, nindot gayud kung naa, kung wala hala katulog ta'g lami, higala, aron momata kitang kusgan kinaugmaan kung tugutan sa Kahitas-an.
Dunay mga butang nga nindot kung bugnaw sama sa tubig o softdrinks nga ilimnon ilabi na kung ilimnom gikan sa ref nga ginainom nato, ice cream nga lamian, bugnaw'ng tingog sa mang-aawit, higala, ug preskong huyop sa hangin sa baybay, parke o halamanan nga atong gina-estambayan, dili ba, manang?
Sa laing bahin, dili nindot ang bugnaw kaayo nga panahon kung tinglaba nato, igsuon, kay manimahong agupop kung dili gamitan og mga produktong magpahumot, migo. Kung bugnaw pod, lami ihabhab ug sige'g pangape, dili ba, mare?
Matud baya sa daghang pagtuon, dili kini healthy, ug mahimong hinungdan sa seryusong problema sa panglawas kay lagi walay disiplina sa pagkaon.
Ang bugnaw pa sa simod sa baboy nga relasyon sa pamilya, higala, silingan, uyab ug uban pa- mas utro pong way lami, higala. Unsa na lamang kaha ang “HOT” coffee, tea, me ug uban pa kung dili na makapukaw sa gilawalawaang pagbati ning atong kinauyokan?
Luyo sa kabugnaw karon sa panahon, dili nato ihikaw ang init sa atong pakigdait sa isig-kaingon aron “happy” lang atong life, igsuon. Happier Saturday, everyone!