ANG kagamhanan sa Pilipinas naningkamot aron nga matabangan ug mapalambo ang kahimtang sa mga kabus sa nasud.
Usa sa mga programa sa gobyerno nga makabenepisyo ang mga pinaka-kabus sa mga kabus mao kining Pantawid Pamilyang Pilipino Program o 4Ps ubos sa Department of Social Welfare and Development (DSWD).
Ang 4Ps mao ang “human development” nga paagi sa nasudnong kagamhanan nga mohatag og conditional cash grants ngadto sa pinakakabus aron pagpalambo sa ilang panglawas, nutrisyon, ug sa edukasyon sa mga bata nag-edad 0-18.
Apan nasayran nga daghan sa nakabenepisyo sa programa gipangprenda ang mga automated teller machine (ATM) cards o cash cards.
Samtang ang uban, gihimo pang kolateral o garantiya sa pagpangutang og kuwarta.
Tataw kaayo sa sumbanan sa Grievance Redress System (GRS) nga ang “Cash Cards, Pantawid Identification Cards” o “Kasabutan” wa gitugot nga gamiton nga collateral aron nga makautang.
Nasayran nga niadtong 2018, dunay 186 benepisyaryo kinsa gitahong naglapas sa maong sumbanan. Hinuon ang rehiyonal nga buhatan sa DSWD nagpahamtang na og lakang batok mga nahisgutan.
Angay nga masabtan sa mga benepisyaryo nga ang maong tabang para nila ug di alang sa ubang tawo. Mao bitaw nga gipili sila nga maoy hatagan niini kay nagkinahanglan sila og panabang.
Kon ingon niini ang dagan sa pagtabang sa gobyerno sa pipila kanila, mas maayong ihatag na lang kini ngadto sa uban nga nanginahanglan pa og dugang tabang gikan sa gobyerno.
Daghan pa baya nga mga pinakakabus ang nagkinahanglan karon og tabang sa gobyerno apan wala matabangi gumikan kay gipaagi pa sa proseso o kaha wala pa maabot sa kagamhanan.
Puriso, alang sa nakabenepisyo niini tarunga ninyo paggamit niini ug ayaw abusohi.