BANSALAN, Davao del Sur -- Daling gitabang sa mga kaubanan ang usa ka sakop sa Citizen Armed Forces Geographical Unit (Cafgu) human naunay sa iyang armas.
Nahitabo ang insidente sud sa ilang detachment sa 72nd Infantry Batallion (IB), Philppine Army sa Barangay Darapuay, alas 11:50 sa buntag, Huwebes, Enero 31.
Si Chief Inspector Rodante Varona, hepe sa kapulisan sa Bansalan Municipal Police Station, nag-ila sa biktima nga si civilian active auxilliary (CAA) Marlon Nasara.
Nasayran nga gilimpyohan sa Cafgu ang iyang “service firearm” nga M14 rifle, dunay serial number 982299 sud sa iyang bunker dihang kalit nga mibuto.
Biktima, asoy ni Varona, naigo sa tuong bahin sa tiyan mao nga daling gidala ngadto sa Centino Hospital sa lungsod.
Gibalhin sab dayon ang biktima didto sa dakbayan sa Davao alang sa makuting pagpanambal.
Gidason sa kapulisan nga “accidental firing” ang hinungdan sa insidente. (Orlando B. Dinoy)