UNSA ang imong buhaton aron ipamatuod nga tinuoray ka nga nahigugma sa usa ka tawo?
Alang kang Danilo “Danny” Lim, bisan kon katulo pa siya mosakay og jeep pasaheroan ug traysikol gikan sa Barangay Poblacion Pardo, siyudad sa Sugbo padung sa Barangay Opao, dakbayan sa Mandaue aron mamisita, di niini igsapayan aron maangkon ang “yes” ni Altea Racuya-Lim nga nahimo niya nga kapikas sa kinabuhi sud sa 25 na ka tuig.
Niadtong Disyembre 22, 2018, gisaulog sa magtiayong Lim ang silver anniversary sa ilang kaminyuon.
Unsay sekreto nga nilungtad og taas nga katuigan ang ilang relasyon?
Pagsinabtanay, respetuay, paubsanay ug paghigugmaay ang mga hinungdan nga hangtod karon nagpabilin nga lig-on ang ilang relasyon, uban sa giya sa Ginuo.
Sama sa ubang mga relasyon, nakaagi usab og mga pagsuway ug kasakit ang duha.
Si Danny, 54, ug Altea, 52, unang nagkaila sa review center sa Salazar Institute of Technology (Salazar Colleges of Science and Technology) niadtong 1989 diin pulos sila nag-review alang sa licensure exam sa kursong Architecture.
Sa maong tuig usab sila nagkauyab.
Apan nagkabuwag ang duha ug wala magkita sud sa duha ka tuig dihang nanarbaho sa laing nasod si Danny.
Niadtong 1991, nagkakita sila og balik ug subling gipangulitawhan sa lalake ang dalaga niadtong higayona.
Giangkon ni Danny nga nahagit siya sa pagpangulitawo og balik kang Altea sanglit siya ang ika-14 ug di usab mga yano ang iyang karibal gumikan kay niadtong panahona hilig ang dalaga moapil og indigay sa muse ug Miss Mandaue.
Aron ipakita ang iyang tim-os nga gugma, matag adlaw sa iyang pagpamisita, katulo mosakay og PUJ ug traysikol si Danny gikan sa ilang balay sa Barangay Poblacion Pardo paingon sa panimalay ni Altea nga nagpuyo sa iyang uyoan sa Barangay Opao.
Dihay mga higayon nga magkaabot sila og pamisita sa ubang mga nangulitawo ni Altea.
Apan nabihag og balik ni Danny si Altea labi na sa pagka maayo niini moduwa og basketball ug dunay sense of humor.
Nakadayeg si Altea sa pagkamatinahuron ni Danny ngadto sa iyang mga minahal sa kinabuhi ug ang paningkamot niini nga makapasar sa licensure exam sa Architecture.
Niadtong 1993, ang duha nakasal sa Archdiocesan Shrine sa Our Lady of Guadalupe, dakbayan sa Sugbo, human makapasar ug nahimo nga lisensyado nga architect si Danny.
Ang ilang maestro sa review center nga si Architect Jose Bañez ang usa sa mga niluhod sa ilang kasal.
Ang magtiayong Lim nitambag sa bag-ong mga naminyo ug nagplanong magminyo nga ipatigbabaw ang pagsinabtanay, pagtahod ug paghigugmaay aron molungtad ang relasyon.
Si Danny, kasamtangang konsehal sa Brgy. Poblacion Pardo samtang kanhi kapitan sa barangay si Altea. (SCG)