KAMPANTE ang kampo ni Mayor Oscar Moreno ilabi na sa kasong gipasaka batok niini kalabot na sa giingong “overpricing” nga mga tunghaan ug gani “proud” pa kini sa mga napatukod nga classrooms sa nagkadaiyang dapit sa siyudad sa Cagayan de Oro.
Gipasakaan og kasong plunder si Moreno gumikan matud sa ilegal nga pagpatukod sa mga lawak saringan o tunghaan nga nagkantidad og P500 milyones diin nanghinobra matud ang kantidad niini.
Nagpahigayon usab og panagtagbo ang local school board niadtong Enero 30 aron na usab nga mahatagan og katin-awan usab ang tanan ilabi na ang membro sa maong board.
Una na nga nagbutyag si Moreno nga kampante kini gumikan kay tanang mga proyekto niagi kini sa pagsusi sa Commission on Audit (COA).
“Tanan natong mga projects ni-undergo kana og audit sa COA and even the COA has stated several times nga atong cost is even cheaper than that of DPWH so we're very very in fact proud nga were been able to do that at lesser cost,” matud ni Moreno.
Matud usab ni Moreno nga nasayod kini nga wala kini gihimong anomaliya sa mga proyekto niini.
“Ako sigurado man ko,I know where I stand”matud niini Samtang gibutyag usab ni Suzette Magtajas-Daba, tsirman sa komitiba sa Edukasiyon nga dili tinuod ang maong alegasiyon gani duna kini sila'y mga ipakitang dokumento nga nagsuporta niini.
Gidugang pa usab niini nga subo lamang kini gumikan kay under investigation pa ang kaso apan sa mga nanggawas sa social media susamang gipagawas nga mura na gyud og duna'y nahitabong overpricing ug anomaliya.
Kahinumdoman nga gipasaka sa usa ka Mike Pada ang kasong plunder batok ni Moreno gumikan sa giingong illegal and unauthorized construction sa sobra 508 ka mga classroom nga nagkantidad og P900,000 hangtod na sa P1.2 milyones.