SI kanhi special assistant to the president Bong Go kalit nga niambak gikan sa ika-15 ngadto sa ikalima, sumala pa sa survey sa Social Weather Stations (SWS) nga gipahigayon gikan sa Enero 23-26, 2019.
Natabla siya sa reelectionist nga si Sen. Sonny Angara.
Alang kanako, dako kaayo nga nakatabang kang Bong Go ang suporta mismo ni Presidente Rodrigo Duterte nga namahayag nga mao kini ang opisyal nga way bisyo gawas ang pagserbisyo.
Tuod man, tungod sa suporta ni Presidente Duterte, awtomatik nga nisuporta kaniya sa miagi pang tuig ang Kilusang Pagbabago sa tibuok Visayas nga dunay grassroots membership nga 300,000.
Atong nasayran nga liboan ka KP Visayas members nag-mobilize alang sa mga sorties ni Bong Go didto sa Capiz, ang teritoryo ni Mar Roxas.
Nangandam na sab sa pagsuyod sa pipila ka lungsod sa kabanikanhan sa Negros ang mga local nga chapter sa KP lakip na dinhi sa Syudad sa Sugbo. Mao kini ang atong nasayran kagahapon atol sa Visayas-wide Political Summit sa maong grupo nga gipahigayon diha sa Cebu Capitol Social Hall.
Kon ingon niini kadasig ang pagsuporta sa mga Duterte supporters, way rason nga mapili gyud nga senador kini si Bong Go.
Survey
Subay sa resulta sa labing ulahing SWS survey, si Sen. Grace Poe ug gisundan nilang Sen. Cynthia Villar, kanhi Sen. Lito Lapid, ug Cong. Pia Cayetano.
Sunod nilang Bong Go ug Angara mao si Sen. Nancy Binay, kanhi senador Mar Roxas ug Bong Revilla.
Gikumpleto nilang Sen. Koko Pimentel, Sen. Bam Aquino, ug kanhi senador Jinggoy Estrada ang Magic 12.
Atong nabantayan nga nawala sa Magic 12 silang Bato dela Rosa ug Imee Marcos.
Hinuon, kon ako si general Bato di ko mabalaka kay siguradong mosuporta man kaniya ang tibuok PNP. Wa say kusog nga kampanya batok sa iyang kandidatura sama sa giatubang ni Kong. Marcos.
Dinhi lang sa Sugbo nga maoy kampo sa oposisyon sa panahon sa diktaduryang Marcos, ubay-ubay pa gyud ang wala makalimot bisan pa man sa grabing kampanya nga kuno kalimtan na lang ang pagpangawat ug ang mga abuso kaniadto.
Sa miaging 2016, si Bongbong Marcos igo rang ikatulo sa mga kandidato alang sa pagka bise presidente.
Akong pangagpas nga mas dako pa ang boto nga makuha ni kanhi senador Serge Osmena dinhi sa Sugbo kay sa ni Imee Marcos.
Bastos
Human nagpabaga sa nawong ang pipila ka mga kongresista tungod niining binilyon nga budget insertion, ilang gisundan kini pinaagi sa pagsiguro nga walay makalili sa ilang mga statement of assets, liability and net worth kun SALN. (@anol_cebu sa Twitter)