LISOD na kaayong sulbaron ang kahuot sa trapiko dinhi sa Sugbo tungod sa way hunong nga pagdaghan sa mga sakyanan. Nagtubo ang numero sa mga sakyanan nga narehistro sa Land Transportation Office (LTO) kada tuig. Apan mas daghan ang motorsiklo ug scooters nga marehistro.
Bisan pa niini, ang four-wheeled nga mga sakyanan ang nakaingon sa problema sa trapiko. Ang pagdaghan sa mga motorsiklo ug scooter reaksyon lang sa problema sa kahuot sa atoang kadalanan. Sama nako nga napugos pagpalit og scooter tungod kay tag usa ka oras kapin ang biyahe nako ug sa akong asawa kon mag PUJ mi.
Naay mga tawo moingon nga problema sa dalan ang mga motorsiklo ug biseklita. Sayop kini nga pagtan-aw. Kon maayo pa ang kahimtang sa atoang trapiko, wa managhan ang two-wheeled nga mga sakyanan.
Sa ubang mga nasod, dunay mga local government unit nga nagtanyag og cash rewards niadtong magbiseklita isip primary mode of transportation. Duha ang giigo sa mao nga problema. Pagdasig sa mga lumolupyo nga magbaton og himsog nga paagi sa pagpuyo ug pagpaminos sa mga sakyanan sa kadalanan.
MAAYONG PANGLAWAS
Kon ang mga LGU nanghatag og pundo para palit og tambal alang sa mga masakiton, nganong di man mo-invest usab sila alang sa maayong panglawas? Maggahin og pundo alang sa mga imprastraktura ug proyekto nga magdasig sa katawhan nga mag-ehersisyo.
Mogahin og pundo alang sa mga lumolupyo nga mopalit og biseklita. Gahinan usab og pundo ang kadtong gustong mag-jogging pinaagi sa pag subsidize sa pagpalit og running shoes.
Magtukod og buhatan nga maoy magtuon niini ug mopatuman sa iyang mga polisiya aron ang kwarta nga gigahin magamit sa iyang katuyoan, sama sa 4Ps sa nasudnong kagamhanan nga malampuson.
Ang nakapait man gud karon, ang pundo nga gigahin alang sa masakiton ug kamatayon. Dunay medical ug burial assistance ang kadaghanan sa mga LGU. Nganong di man maggahin alang sa maayong panglawas. Di ba?
PROACTIVE
Wa may dautan kon maggahin og medical ug burial assistance kay ang tanang mga tawo masakit ug mamatay man. Apan mas maayo usab nga pundohan ang maayong panglawas. Pinaagi niini, mas productive ang community kay maayo ang kahimtang sa panglawas sa iyang mga lumolupyo.
Unya ang kanang mga gym sa mga barangay, di intawon na gamiton alang sa mga meeting. Alang kini sa mga duwa sama sa basketball, volleyball, tennis ug uban pang mga matang sa paugnat sa kusog.
Alang ni sa pasingot. Mao gani nga gitawag nag gym.