NA-HARVAT gayud ni PBB Housemate Melisa Cantiveros from General Santos City ang kadaugan sa Pinoy Big Brother (PBB) Double Up edition.

Nakuha ni Melisa ang dungog isip Big Winner human niya nasungkit ang 32.08% nga kinatibuk-ang text votes.

Ang biba ug chikadorang taga-Gensan, mao na ang lamang ang babaye sa Big 5 human nga natangtang sa competition ang laing babaye nga si Mariel gikan sa Davao.

Bongga ang girl tungod kay gawas nga naka-harbat og fafa sud sa PBB House (si Jason), maangkon sab niini ang P2.5 million house-and-lot ug uban pang mga bonggang premyo.

Naunhan gayud ni Melisa ang kanhing nanguna sa text votes nga si Paul Jake Castillo sa Cebu.

Nisunod si Paul Jake kang Melisa human niyang maangkon ang 27.31% sa text votes.

Miplastar sa ikatulo ang boyfriend ni Melai nga si Jason Francisco nga nakaangkon sab sa 24.97% ka mga boto.

Mi-puwesto sa ikaupat si Johan Santos samtang si Tibo Jumalon sa Cagayan de Oro ang naa sa ikalima.

Si Johan mikuha sa 7.94% sa text votes samtang si Tibo, niangkon sa 7.69%.

Libuan ka mga PBB fans ang naghuot sa Ninoy Aquino Stadium Sabado sa gabii aron lamang masaksihan ang finale sa matawag nga labing sikat nga edition sa PBB.

Gawas sa mga housemates, nalingaw sab ang mga fans sa mga star-studded performances.

Lakip sa mga nag-perform sa Grand Night mao sila Yeng Constantino, Bugoy Drilon, Mark Bautista, Charice, Charlie Green ug international dance group Jabawockeez.

Present sab sa okasyon ang mga kanhing PBB Double Up Housemates.