Sharks mitukob sa Kuyas: MPBL

MIAMAG na’g samot ang paglaom sa Cebu City Sharks nga makasulod sa playoffs human nila gipanglampornas ang Bulacan Kuyas, 70-54, niadtong Sabado sa gabii sa Maharlika Pilipinas Basketball League (MPBL) Datu Cup sa Angeles University Foundation gym sa Pampanga.

Ang Sharks, nga aduna na’y duha ka nahabiling mga duwa sa elimination round, ningsaka na karon sa ikaunom nga dapit sa South division dala ang 11-12 nga rekord.

“Mind set lang gyud nga kinahanglang makasulod mi sa playoffs. Wala man gyud ta mag-expect og dako from the start pero naa na man ni, kinahanglang dili ni namo buhian nga chance,” matod ni Sharks coach Titing Manalili.

Ang 16 puntos nga kadaugan batok sa usa sa lig-ong teams sa North division seguradong makahatag og dugang moral sa Sharks sa tinguha niining makaabante sa playoffs.

Bisan sa kapildihan, ang Kuyas nagpabilin sa ikalimang dapit sa North division bitbit ang 13-9 nga rekord.

Gipasabot ni Manalili nga dili sila molugak ug buhaton nila ang tanan aron modaog sa nahabiling duha ka mga duwa niini batok sa Quezon City Capitals (9-10) ug Zamboanga Valientes (8-12).

Ang Sharks, nga mikontrolar na sa duwa gikan pa lang sa sinugdanan, gipangulohan ni Joel Lee Yu pinaagi sa iyang 18 puntos, nidugang og 12 puntos si Rhaffy Octobre, niamot og siyam ka puntos si William McAloney, nidugang og walo ka puntos si Kevin Villafranca samtang nitunol og pito ka mga puntos si Jaybie Mantilla. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph