GITAMBONGAN sa nagkadaiyang mga relihiyosong sektor ug uban pang mga grupo ang Interfaith prayer rally kagahapon, Pebrero 2 sa Kiosko, Kagawasan, Divisoria ning siyudad sa Cagayan de Oro.
Nag-unang tumong niini mao nga ipakita nga nagkahiusa ang tanan bisan unsa pa man ang relihiyon sa tumong nga makab-ot gayud ang kalinaw ug kahusay sa siyudad ug sa tibuok Mindanao lakip na sa nasud.
Matud ni Msgr. Rey Monsanto, JCD, HP, SSJV, Director sa Interfaith sa Archdiocese sa Cagayan de Oro nga kining maong kalihokan aron nga malikayan ang mga pagduda sa katawhan nga nagbinaslanay ang managlahing relihiyon tungod na usab sa mga pagpamomba diin una ang Cathedral sa Jolo, Sulu ug gisundan sa mosque sa Zamboanga City.
"Kitang tanan nagkondenar niini, atong ipakita nga nagkahiusa ta sa Mindanao dili tong nagpinatyanay ta sa usag sua tungod lang sa relihiyon hinaot pa nga dili ni mahimong religious war dinhi sa Mindanao mao ng atong gipaninguha nga di na mahitabo dinhi mao ng duna gyud interfaith prayer rally," matud ni Monsanto.
Kini usa ka tinuig nga kalihokan nga gitawag og World Interfaith harmony week apan tungod sa nahitabo hinungdan nga mas gipadali nga mamahimo na ang maong kalihokan.
Samtang gibutyag usab ni Mohammad Gondarangin, chairman sa CDeO Muslim-Christian community council nga angayan nga magkahiusa ang tanan aron nga dili na mahitabo ang susama nga panghitabo sa Jolo, Sulu ug sa Zamboanga City.
"Magkahi-usa ta nga dili ni mahitabo sa Cagayan de Oro, kung dili kita maghiusa ang looy ang civilian sila gyud ang biktima, ang atong buhaton para dili gyud ni mahitabo utro sa atong mga simbahan ug sa atong mga mosque," matud usab ni Gondarangin.
Dako ang pasalamat usab sa kapulisan sa maong kalihokan aron mapakita nga solid ang katawhan sa siyudad ug dili kini makapausab sa maayong relasiyon tali sa nagkadaiyang relihiyon.
"Dako kaayo mi og pasalamat, nalipay kami nga gihimo kani sa atong interfaith, katolikong simbahan,mga other Christian, mga Muslim para mapakita nga dili nato himoon nga war of religion labi na gyud ang nahitabo sa Zamboanga ug Jolo, gusto nato ipakita nga dili kini ang batasan sa mga tinuod nga Kristiyano ug Muslim specially of course sa atong mga lumad," matud ni P/Supt Mardy Hortillosa, tigpamaba sa Cagayan de Oro City Police Office (Cocpo).
Nasayran nga naghatag og nagkadaiyang mga mensahe, pag-ampo ug mga pahayag ang nagkadaiyang relihiyosong sektor ug uban pa aron ipakita nga nagkahiusa sa tumong nga makab-ot ang kahusay ug kalinaw dili lamang sa siyudad apan sa tibuok Mindanao ug sa nasud.
Wala'y pamulitika
Nanghinaot usab ang kapulisan nga dili na usab hatagan og kahulogan ang gihimong Interfaith prayer rally ug dili kini himoan og isyu nga pamulitika tungod na usab kay tumong lamang niini mao ang panawagan ug ipakita ang panaghiusa alang sa kalinaw.
Gibutyag ni Hortillosa nga kining maong kalihokan alang sa tanan ug wala kini bulok sa pulitika.
Una na nga nagpagawas og pahayag si Mayor Oscar Moreno nga suportado niini ang maong kalihokan ug dili na lamang kini motambong aron usab nga dili na kini mahatagan og isyu.
"Prayer rally, dako kaayo og tabang,makahatag og inner strength sa community nga I'm supporting that prayer rally although ila mang nasabotan nga walay pulikto nga mosulti, okay lang sa ako, di nalang sa pero I am supporting that, ang city hall employees are going to attend that, I directed Teddy Sabuga-a, our adminsitrator to provide full support," matud ni Moreno atol sa pagbukas sa Chinese New Year.
Nasayran nga duna'y nigawas usab nga pahayag nga ang maong kalihokan politically motivated human nakadawat matud ang kaatbang niini sa pulitiko og impormasiyon nga gihulga sa mayor ang mga empleyado sa kalihokan nga gani giingong “City hall sponsored Inter-Faith Mass-Rally.”
Wala'y bisan usa ka pulitiko ang personal nga naghatag og mensahe atol sa mga kalihokan ug duna lamang kini tagsa-tagsa ka mga partisipante aron mapadayag ang ilang mga mensahe.