MALAMPUSON nga napanalipdan sa nagdumala nga Davao City ang ilang overall title sa Davraa 2019 nga misira didto sa Davao City-UP Sports Complex niadtong Sabado.
Gipupo sa siyudad sa Davao ang kinatibuk-ang 170 bulawang medalya, 125 plata ug 59 bronse aron nga idagan isip mananaug sa usa ka semana nga paugnat sa kusog nga nagsilbing "qualifying" alang sa Palarong Pambansa 2019 nga gitakda sa Abril 27 hangtud Mayo 4 dinhi gihapon sa dakbayan.
Ang Tagum City maoy ikaduhang overall human mihakot og 56 bulawan, 59 plata ug 47 bronse samtang ang Panabo City nahiluna sa ikatulo uban sa 45 bulawan, 40 plata ug 51 bronse.
Ang Digos City (26-26-43), Davao del Norte (14-21-56) ug Davao Occidental (14-10-27) mitapos sa unang unom samtang nagsunod ang Compostela Valley (10-31-55), Davao del Sur (10-19-39), Mati City (8-10-15), Davao Occidental (7-8-37), ug Island Garden City of Samal (0-3-13).
Sa nanghinapos nga duwa sa dakbayan sa Davao sa maong adlaw, midaug ang secondary boys basketball team batok sa Digos City, 90-73, sa finals didto sa University of Southeastern Philippines (Usep) Gym.
Nikamada si Vince Petdeo Cuajao, kinsa Palarong Pambansa 2018 silver medal performer, og 31 puntos aron nga manguna sa Davao City Durians, gigiyahan ni Nestor Sorrosa.
Nitampo sab si Froilan Tingabngab og 17 samtang si Miguelito Manuel dunay 13.
Giangkon ni Sorrosa nga di sayon ang final nga tigi tungod sa kakusog sa Digos City.
"Grabe shooters sa Digos, mushoot jud sa three-point area. Namaintain ra namo pressure defense sa ilaha. Dili jud pwede luagan kay mulabay jud dayon. Na-neutralize lang jud namo sila," tug-an sa beteranong coach ngadto sa SunStar Davao.
Tug-an sab niya nga ang tim sa rehiyon sa Palaro 2019 ayudahan sa duha ka magdudula gikan sa Digos City ug usa gikan sa Tagum.
Kadto na ang ikatulong sunod-sunod nga daug sa Davao City sa Davraa secondary boys basketball apan matud ni Sorrosa nga kini na ang ika-15th nga titulo sa Davraa alang sa tim sa siyudad uban sa Holy Child College of Davao Red Eagles isip maoy kinauyokan nga magduduwa.