USA ka 31 anyos nga lalaki ang wa gyud kapaabot nga saulugon ang Valentines Day human kini miambak sa pantalan nga miresulta sa iyang kamatayon.
Sumala pa nga ang biktima may bug-at nga suliran, og tungod wa na kini maka-agwanta nakadesisyon kini nga moambak sa lawom nga bahin sa pantalan didto sa siyudad sa Digos.
Ang Digos City Police Office (DCPO) nag-ila sa biktima nga mao si Manuel Giovanni Sarausad, minyo ug lumolupyo sa Barangay San Jose sa siyudad.
Subay sa inisyal nga imbestigasyon sa kapulisan, mga ala 1:30 sa hapon, Pebrero 13, dihang niadto si Sarausad sa pantalan sa Barangay Dawis, way daghang pagduha-duha miambak kini sa lawom nga pantalan.
ga nakakita sa biktima nisuway pa paghatod kaniya sa Davao del Sur Provincial Hospital apan nagpanlingo na ang mga misugat nga doktor sanglit gideklara siyang dead on arrival.
Sa nakutlong impormasyon sa Sun. Star Superbalita, giingong nakahimo pa pag-text ang biktima sa iyang mga higala og matod pa nga nagpasalamat kini kanila sa mga maayong handumanan nga iyang bawnon sa laing kalibutan.
Naglibog ang kapulisan kun nganong gihimo niini ang pagpakamatay mao nga nagtuo silang personal nga suliran ang nakahasol sa biktima.
Gidala na ang patay'ng lawas niini sa Angel Funeral Home sa siyudad.
Gilauman nga ipailawom sa otopsiya ang patay'ng lawas aron masuta kun wa ba'y foul play sa iyang kamatayon. (Orlando B. Dinoy)