LAAK, Compostela Valley -- Patay ang magpuyo human sila gipusil didto sa Purok 6, Sityo Patung, Barangay Langtud, ala 1:30 sa hapon, Huwebes, Enero 31.
Ang mga biktima giila nga sila Nancy L. Telespero, 51-anyos ug Warlito B. Taripe, 57-anyos, mag live-in partner, nagpuyo sa sa Purok 6, Sityo Patung, Barangay Langtud, Laak, Compostela Valley.
Ang imbestigasyon sa Laak Municipal Police Station nagkanayon, nga ang mga biktima naglakaw paingon sa ilang umahan dala ang mga balon ug abuno sa ilang pananom.
Nasayran nga kalit mibutho ang wa mailhing mga mamumuno ug gipusil ang mga biktima.
Nakahiagom og daghang mga samad-pinusilan sa nagkadaiyang parte sa ilang mga lawas ang mga biktima nga misangpot sa ilang hinanaling kamatayon.
Ang mga suspek paspas nga miikyas paingon sa Barangay LS Sarmiento, Laak, Compostela Valley human sa hitabo.
Sa pagsubay sa kapulisan sa dapit sa nahitaboan, narekober sa mga imbestigador ang duha ka basiyo sa bala sa .45 nga pusil.
Hangtud sa pagsuwat niining balita, wala pay natumbok nga suspek ang kapulisan busa nagpadayon pa ang ilang imbestigasyon.