ANG spokesperson sa Alsa Masa sa dekada 80 nanawagan karon sa katawhan nga magpakabana sa suliran sa insurhensiya sa siyudad sa Davao.
Ang panawagan gikan kang Romy Remo, usa sa pito ka mga tawo nga nag-organisa sa Alsa Masa niadtong 1986, kinsa nahimong dinapit nga bisita sa gihimong press conference sa 10th Infantry Division sa Philippine Army didto sa Kane Restaurant, dalang Magallanes niadtong Sabado.
Si Remo nagbutyag nga misamot karon ang suliran sa insurhensiya sa kabukiran sa Marilog ug Paquibato busa nanawagan siya sa katawhan nga magpakabana sa maong
suliran.
"Kinahanglan nga moalsa ang katawhan batok sa mga rebeldeng New People's Army (NPA) ug sa mga kaalyadong progresibong partylists," pahayag ni Remo.
Si Remo, usa sa mga nagtukod sa Alsa Masa kaniadto didto sa Gotamco, Barangay Leon Garcia, Agdao nga maoy hinungdan nga milayas ang mga sparrow unit sa NPA.
"Ang among gihimo kaniadto, nagbitbit na og mga armas ang mga tawo ug among gipangita ang balay sa mga sparrow unit mao nga milayas sila. Wala naman gud mi nakauyon sa ilang gihimo kaniadto mao nga mialsa mi," pahayag ni Remo.
Niya pa, human nila napalayas ang mga rebelde wala silay nadawat nga programa sa gobyerno isip bugti sa ilang nahimo nga kaayuhan sa pagpatunhay sa kahusay ug kalinaw sa siyudad kaniadto.
Tungod niini, ang Civil Military Operations naglaraw nga makig-alayon sa lokal nga kagamhanan aron ilang mahisgutan kung unsa nga mga programa ang mahatag sa mga Alsa Masa.
"Kami po ay naglalayon na makipag-usap sa ating local government officials and other government agencies para mapag-usapan ang mga programa na dapat sa kanila," ni Lt. Col. Manny Sequitin sa Civil Miliatary Operations (CMO) sa Philippine Army dihang gipangutana sa mga tigbalita.
Sa laing bahin, sa tumong nga makita sa katawhan nga ang militar nagmahal sa mga nagkinahanglan, ang 10th Infantry Division naglusad og nagkadaiyang programa atol sa pagsaulog sa Valentines Day.
"Kami po ay nagsagawa ng tree planting and blood letting activities sa buong division in celebration of Valentines Day. Mamimigay din kami ng mga wheel chairs sa mga differently-abled person bukas sa headquarters," ni 10th ID Public Affairs Office chief Captain Emmanuel Garcia dihang gipangutana sa mga tigbalita niadtong Sabado.
Tumong sa militar nga makita sa katawhan nga dili lang kutob sa pakiggubat ang militar apan nagpakabana sab sila sa mga katawhan nga nagkinahanglan, sigun sab sa mando ni 10th ID commanding officer Major General Carlos Holganza. (AD)