WA PA gani makabuylo ang ting-init, gihasi na og alarma sa sunog ang Sitio Tabucanal sa Barangay Poblacion Pardo, dakbayan sa Sugbo kagahapon sa buntag, Pebrero 3.
Sa mga wala masuheto sa maong dapit, mao ni ang dakong luna nga grabe ka sudlonon diin nahimutang ang nagdasok nga mga panimalay.
Sa mga nagsunod sa atong asoy, mao ni ang dapit diin personal nakong gikuyogan ang mga opisyal sa Cebu City Fire Department kaniadto aron personal nilang makita kung unsa kalisod ang pagtubag og alarma sa sunog sa maong dapit.
Gikan maong pagbisita diha nay mga alarma sa sunog nga gitubag ang mga bombero.
Ang alarma gahapon maoy pinaka uwahi og sama sa naandan ang dakong suliran sa agianan sa ilang mga fire truck maoy nag-unang problema.
Kini nga suliran dugay na nga giantos sa mga lumolipyo. Hangtod karon pabiling wa masulbad. Samot na kong ang alarma matunong sa gabii. Access road maoy dinaliang panginahanglan sa maong dapit.
Si Melio Avila nagpuyo sa maong dapit niasoy nako sa dakong kabalisa nga ilang gibati.
Diha ka dupa nalang ang gilay-on gikan sa ilang balay ang distansiya gikan sa mga panimalay nga gilamoy sa kayo. Mao sab sa ilang Badoy Gloria nga iyang silingan.
Kini silang kanunay nakong maestoryahan labot sa ilang kahimtang sanglit sila kauban man sa mga molopyo nga nahinabi sa mga bombero atol niadtong ilang pagbisita pipila ka tuig na ang nakalabay.
Kong di madali dali ang pagbutang og access road ang nag-una nakong sugyot mao ang rehabilitasyon sa mga tubo nga gikutay padung sa Lower, Middle og Uper Tabucanal.
Gipatuman ni kaniadto pinaagi kang anhing City Councilor Jingjing Osmena isip Chairman sa Committee on Police, Fire and Penology.
Nindot kaayo ang maong proyekto nga iyang gipatuman di lang sa Tabucanal apil na sa ubang mga sudlonon nga bahin sa dakbayan . Ang maong mga tubo gidesinyo nga kong may sunog sa ilang dapit may pressure sa tubig nga sarang makasukol sa nagdilaab nga kayo.
Galing lang wa makalahutay ang maong proyekto kay gipangahoyan sa mga kawatan ang mga accessories.
Si kanhi Bsrangay Kapitan Althea Lim kauban da mga bombero nga akong gikuyogan kaniadto pagsusi sa maong proyekto nakadiskubre nga may mga basura nga nihuot sa gikutay nga tubo.
Ang rekomendasyon sa mga bombero lapad nga rehabilitasyon ang himoon aron subli kining mapuslan.
Gawas sa Tabucanal mao sab ni ang nahitabo sa barangay. Di na mapuslan ang nag-unang pang-alkuntra sa alarma sa sunog.
Manghinaot ta nga matutukan kini sa atong lokal nga pangagamhanan og sa DILG nga maoy payong sa atong mga bombero.
Kini nga problema di pa dugay nga akong gipaabot kang Michael Avarquez ang gitugyanan ni Kapitan Litang Abarquez sa Disaster Preparedness sa ilang barangay.
Kong naa lay 200 PSI kun pressure matag segundo nga itira sa pagsugod og dilaab sa kayo dako kaayo ang purohan nga kini di makadako og malibre ang ubang panimay.
Kong di kini lihokon karon kanus-a pa man? Sa atong mga kaigsuonan nga may subra sa ilang grasya ang mga biktima sa sunog sa Tabucanal nagpaabot sa inyong kaluoy.