Magtutudlo dili mapugos: Supt. Dagatan

DILI mapugos ang mga magtutudlo nga moserbisyo sa 2019 mid-term elections hilabi na nga walay pundo nga gigahin ang gobyerno para sa ilang honorarium.

Kini ang gipadayag ni Supt. Bianito Dagatan sa Department of Education (DepEd) Cebu City division subay usab sa Republic Act No. 10756 kun Election Service Reform Act, “An Act rendering election service non-compulsory for public school teachers, authorizing the appointment of other qualified citizens and other benefits.”

Si Atty. James Jimenez, tigpamaba sa Commission on Election (Comelec), nagkanayon mga ilawon sa reenacted budget nga maoy gigamit sa unang mga buwab sa tuig, 2019 walay honorarium nga madawat ang mga sakop sa Board of Election Tellers (BET) sanglit way eleksiyon sa miaging tuig.

Apan si Dagatan niingon nga bisan pa man kon sa pagkakaron wa pay klaro nga dunay madawat ang mga magtutudlo, gipaneguro niya nga aduna gihapoy mga magtudulo nga moserbisyo sa eleksiyon.

Gani nipadala na siya og komunikasyon ngadto sa mga principal sa matag tunghaan aron sa paglista sa ilang pangan aron iduso ngadto sa Comelec kinsa maoy mo-finalize sa listahan.

Apan si Dagatan nanghinaot nga mapasar sa Kongreso ang General Appropriations Act (GAA) diin nalakip ang pundo para sa piniliay.

Kampante si Atty. Marchel Sarno sa Comelec Cebu City mga dili mamahimong babag ang hisgutanan sa honorarium sa magtutudlo sa May elections.

Matod pa ni Sarno nga bisan kon walay pundo ang national government ilawon sa reenacted budget nga maoy gipahibawo ni Jimenez, magpadayon sa pagserbisyo ang mga titser.

Si Sarno niingon nga bisan pa kon walay madawat nga honorarium ang BET inig human sa eleksyon, apan sigurado siya nga mosunod ra ang ilang bayad inig pasar sa 2019 GAA.

Gawas niini, ang mga government employee nga moserbisyo, adunay lima sa adlaw nga leave credits.

Base sa section 4 sa RA 10756 nga adunay P6,000 nga honorarium ang chairperson sa electoral board, P5,000 sa mga miyembro ug P2,000 para sa support staff wa pay labot sa ilang transportation allowance. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph