DUHA ka mga Indian national ang nakatagamtam sa kabangis sa usa ka tawo pinaagi sa pagbunal kanila og botelya sa ulo nga miresulta sa ilang paghidangat sa San Pedro Hospital.

Ang insidente nahitabo sa alas 4:00 sa kaadlawon kagahapon didto sa kanto mga dalang Rizal ug Anda, siyudad sa Davao.

Mga biktima mao sila Yalamanlihli Nikimi Lesh, 21; ug Mummadi Khrisna Kumar, 21, pulos estudyante ug nagpuyo dapit sa Davao Medical School Foundation (DMSF) Drive, Bajada.

Ang blotter sa San Pedro Police Station nagbutyag nga gikan nag-inom ang duha ka mga biktima sa 183 Resto Bar sa dalang Rizal.

Mga biktima giingon nga nagbaklay gikan sa maong bar paingon unta didto Jollibee dalang Bolton apan dihang miabot sila sa dalang Anda kalit silang gigukod sa wala mailhing tawo dayon gibunalan og botelya ang ilang ulo.

Si Lesh ug Kumar daling gidala ni Frederick Sescio sakay sa taxi paingon sa Davao Medical Center (DMC) apan tungod kay grabe ang ilang kahimtang nagpabalhin sila sa San Pedro Hospital.

Mga biktima giatiman karon Dr. Raymund Lu samtang ang kapulisan nagsusi sa maong hitabo aron mailhan ang tawo nga mibunal sa duha ka Indian national.

Sa laing bahin, giandam na sa kapulisan ang kasong homicide batok sa usa ka mag-uuma kinsa midunggab patay sa iyang kainom nga gikalalis niadtong Huwebes.

Ang suspetsado mao si Ruben Javira, 45, kinsa maoy midunggab sa biktima nga si Alexander Margaha, 42, mag-uuma, pulos nagpuyo sa Sitio Palangang, Barangay Lumiad, distrito sa Paquibato.

Si Javira maoy miduslak sa tiyan ni Margaha mao nga gidala ang nauwahi sa DMC diin siya namatay pipila ka oras samtang gitambalan sa mga doktor.

Ang suspetsado milayas human sa hitabo apan nasikop niadtong Biyernes sa mga opisyales sa barangay kinsa maoy mitunol kaniya didto sa Paquibato Police Station. (AD)