ANDAM nga mohatag ug pahalipay ang pamilya ni anhing Fiscal Mary Ann Castro sa mga tawo nga posibleng makahatag ug impormasyon labot sa mga indbiwal nga maoy responsable sa pagpatay sa piskal sa miaging buwan.
Ang anak ni Mary Ann nga si Monique Roa nitug-an nga ang paghatag og reward, usa sa mga gitan-aw nila nga option sa pagka-karon. Kini ilabi na usab kay pareho ang kapulisan ug National Bureau of Investigation (NBI) 7 nga wala pa’y tataw nga lead labot sa mga suspek ug motibo sa krimen.
Human nalubong si Castro niadtong Enero 26 sa Clarin, Misamis Occidental, nibalik usab dinhi sa Sugbo ang iyang anak ug ubang sakop sa pamilya aron magpakisusi samga awtoridad sa dagan sa ilang imbestigasyon.
Nasubo lang si Monique kay wala pa gyuy tataw nga impormasyon bahin niini, ug gani ang dashboard camera nga diha sa sakyanan sa iyang inahan atol sa insidente, wala nama’y footage sa tibuok Enero 17 ug sa mga adlaw sa wala pa ang hitabo.
Nagtuo si Monique nga dunay mga tawo nga nakasaksi sa insidente sanglit duna may daghang establishemento duol sa nahitaboan ug diha sa’y daghang mga sakyanan nga kadungan si Fiscal Castro nga nagsubay sa dan Escario, dihang gibanhigan siya.
“That is an option that we are exploring. The family is thinking of offering up a reward for an informant but also we are pursuing whatever legal remedies we can , our own investigations, perhaps a private prosecutor kung naa na’y ma-identify nga assailant and I’m hoping that would happen soon. So whenever we can (makahatag bounty),” padayag ni Monique.
Bisan ug wala pay tataw nga lead sa krimen, nalipay nalang si Monique sa nahimo sa NBI7 nga nakakolekta na ug pipila ka mga CCTV footage nga posibleng makatabang pagsulbad sa krimen.
Gitug-an usab niya, nga sila sa iyang pamilya, hilom usab nga naghimo ug kaugalingon nilang pakisusi sa insidente.
May nakit-an na usab siya nga mga CCTV footage sa wala pa gibanhigan-patay si Mary Ann. Nakit-an niya ang duha ka mga tawo nga nag-motorsiklo nga diha pa lang sa pag-gawas sa piskal gikan sa Ayala Center Cebu, nagsunod na daan kaniya.
“Sa ako pa ning inahan, di man gyud ni niya lung-an...” niingon si Monique.