DILI mominos 145 ka mga balay ang naabo sa duha ka mga sunog sa dakbayan sa Sugbo ug dakbayan sa Talisay kagahapon, Enero 3.
CEBU CITY
Tulo ka mga molupyo ang naangol ug 377 ka mga indibidwal ang apektado sa pag-ulbo sa sunog sa Sitio Tabucanal, Barangay Poblacion Pardo, siyudad sa Sugbo, Dominggo sa buntag, Pebrero 3.
Si Poblacion Pardo Barangay Kapitan Manolita “Litang” Abarquez niingon nga niabot og 85 ka mga balay ang nangaugdaw sa sunog samtang 11 ka mga balay ang nakan-an sa kayo.
Sa buwag nga banabana sa Cebu City Fire Department, niabot og 50 ka mga balay ang naugdaw sa sunog diin nadawat ang alarma alas 8:59 sa buntag, sumala ni Fire Chief Inspector Noel Nelson Ababon, fire marshal ning dakbayan.
Mokabat og P1.2 milyones ang gibanabanang danyos sa sunog.
Matod ni Abarquez, kuhaan nila ang kapin sa P400,000 nga calamity fund aron abagan ang 96 ka mga pamilya nga nasunogan base sa ilang pasiuna nga assessment sa apektadong mga molupyo.
Karong Lunes, Pebrero 4, modeklarar ang konseho sa barangay og state calamity sa apektadong lugar aron magamit ang ilang calamity fund.
Si Abarquez nibutyag nalandig sa intensive care unit (ICU) sa Cebu City Medical Center (CCMC) si Christian Jade Solonia, 18, kinsa nagrabehan gumikan sa mga paso nga naangkon human kini giingong nibalik sa ilang balay aron pagkuha sa iyang cellphone samtang ang ig-agaw niini nga si Renedith Solonia, 20, dunay kakulian sa lawas, ang napaso usab nga diha sa ilang panimalay atol sa sunog.
“Maayo gani nabira ni siya (Renedith) sa usa ka volunteer nato maong di kaayo siya dako og (paso). Ang usa (Jade) kay nisud man gyud pagbalik, mao tong nahagba” asoy ni Abarquez dihang nahinabi sa Superbalita Cebu.
Laing nakaangkon og paso sa iyang bukton ug nawong mao si Mario Tabura, kanhi loader sa barangay, diin sa ilahang panimalay nagsugod ang kayo.
Alas 9:02 sa buntag, giisa na sa ikaduhang alarma ang sunog human nikatap ang kayo sa kasikbit nga mga balay ug pagka alas 9:15 sa buntag, gibutang sa ikatulong alarma ug nakontrolar ang kayo alas 10:09 sa buntag. Hingpit na-fire out ala 1:44 sa hapon.
Sigon ni Ababon gisusi pa ang hinungdan sa pag-ulbo sa kayo sa panimalay ni Tabura.
Ang mga biktima sa sunog temporaryo nga gipahimutang sa gym sa barangay tapad sa Pardo National High School ug giatiman sa Department of Social Welfare and Services (DSWS).
TALISAY CITY
Samtang, dili mominos 60 usab ka mga balay ang naabo sa Sitio Galaxy ug Sitio Rattan sa Barangay Tangke, Talisay City kagahapon,
Si Sr. Insp. Ara Alfajaro sa Talisay City Fire Station niingon nga ilang nadawat ang alarma sa ala 1:50 sa hapon.
Pagka alas 2:15 sa hapon, giisa sa Task force alpha ug Task force bravo sa alas 2:32 sa hapon. Gideklarar nga fire out sa alas 4:10 sa hapon.
Atol ning pagsuwat, ang mga bombero naghimo pa og pakisusi sa sinugdanan sa kayo ug danyos sa sunog.
Walay naangol o nakalas ug ang mga biktima temporaryong gipahiluna sa Tangke Elementary School ug sila giatiman sa DSWS. (Dugang ni Wenilyn Sabalo - USJ-R Intern)