DUHA ka mga lalaki ang pulos nilanding sa balay tambalanan human giluba dihang nagdisko niadtong Sabado sa gabii.

Unang biktima mao si Robert Jhon dela Pe¤a, 19, taga Mat-i lungsod sa Naawan, Misamis Oriental.

Gitumbok nga suspetsado mao si Arnulfo Janolino, silingan sa biktima.

Nasayran nga adunay natigayong disco sa maong dapit subay sa pagsaulog sa Valentines dihang pagawas sa biktima sa diskohan, kalit kining giatangan ni Janolino ug deretso nga giluba gamit ang kutsilyo.

Nakaangkon og samad sa tiyan ug sa likod nga bahin ang biktima hinungdan nga daling gidala sa Northern Mindanao Medical Center (NMMC) ning siyudad sa Cagayan de Oro.

Padayon nga giobserbahan sa mga doktor ang biktima ning panahona.

Samtang upat ka samad dinunggaban ang naangkon ni Gerald Tandoc, 21, ulitawo, taga Lapasan ning siyudad human giluba gawas gihapon sa diskohan sa Lapasan Basketball Court kagahapon mga alas 2:00 sa kadlawon.

Susama sa nahitabo ni dela Pena aduna gihapon gipahigayong disko sa maong dapit dihang migawas sa diskohan si Tandoc ug giatangan sa wala mailang suspetsado.

Deretso nga giluba ang biktima makaupat ka higayon, samtang dali dayon nga misibat ang suspetsado human sa hitabo.

Gidala sa NMMC si Tandoc nga kritikal ang kondisyon ning panahona. Ang kapulisan sa Police Station 3 nagtup nga paregla ang motibo sa pagpangluba. (SVB)