USA ka job order employee sa Mandaue City hall ang nasikop human nakuhaan og mga pinakete sa gituohan nga shabu atol sa Commision on Elections (Comelec) checkpoint, pasado alas 12 Domingo sa kaadlawon, Pebrero 3.
Ang nasikop giila nga si Neil Cabahug, 42, job order employee ubos sa City Treasurer's Office.
Ang checkpoint gihimo sa may dalan A. Soriano, Barangay Centro, Mandaue City.
Matud ni Senior Police Officer 3 Renato Canja, desk officer sa Centro Police Station, nga lulan si Cabahug og motorsiklo uban ang usa ka Pompeyo Lofranco nga gikan sa dakbayan sa Sugbo.
Nakuha gikan kang Cabahug ang tulo ka mga pinakete sa shabu.
Apan nidumili na sa paghatag og pamahayag si Cabahug kalabot sa mga nakuha nga shabu gikan kaniya.
Ang gihimakak lang niini nga dili na siya aktibo karon nga kawani sa City Hall, sukad pa sa niaging tuig.
Si Cabahug ug Lofranco ang lakip sa 12 ka mga dinakpan sa checkpoint ug laing unom usab ang nadakpan niadtong Sabado sa kadlawon, Pebrero 2.
Moabot tanan sa 18 ka mga tawo ang nasikop atol sa Comelec checkpoint sa Centro Police Station.