GIPAPRISO sa usa ka driver ang usa ka bayot kinsa giingong kulang ang gibayad nga plite kagahapon mga alas 3:00 sa kadlawon sa Agora Road, Lapasan ning siyudad sa Cagayan de Oro.
Kalagot ang gibati sa usa ka driver nga mao si Ronald Bersabal, 28, ulitawo, taga Balulang ning siyudad, driver sa motorela nga nagdala sa plaka TM530.
Gitumbok nga suspetsado mao si Arejade Guia, 22, taga Trinitas, Bugo ning siyudad.
Si Senior Police Officer 2 Howard Lagsa sa Police Station 3 (PS3) sa Agora nibutyag sa Sun.Star Superbalita nga gibalhog sa prisuhan ang maong bayot tungod sa pagbuak niini sa samin sa motorela ug naglasong kini tungod sa kahubog.
Nasayran nga nagpahatod si Guia ni Bersabal ug kulang ang kuwarta sa suspetsado hinungdan nga gipangutana sa driver apan nasuko ang bayot og gisipa ang samin sa motorela.
Nisangpot sa sinukmagay hinungdan nga ubay-ubay sab nga bun-og ang naangkon ni Guia human gitabangan usab sa mga istambay sa maong dapit.
Sa iyang bahin ni Guia nga nahinabi ning mantalaan niingon nga P20.00 ang iyang giplite sa motorela apan kalit lang nga nasuko sa Bersabal ug niingong nga kulang ang iyang bayad.
Nasuko si Guia tungod sa sobrang pagpangayo niini sa plite apan siya nga gisukmag.
Misukol si Guia ug napahimungtan ang side mirror sa motorela hinungdan sa pagkaguba niini.
Nagtingkagol sa prisuhan ning panahona si Guia human gipariso ni Bersabal, kinsa nahuwasan na sa iyang kahubog ning panahona. (Stephanie V. Berganio)