USA ka traysikad drayber ang gipusil sa iyang pasahero niadtong Miyerkules mga alas 4:00 sa hapon dinha sa Barangay Balulang ning siyudad sa Cagayan de Oro.
Saysay sa biktima nga mao si Argentino Corstar, 46, minyo, taga Barangay 27, ning siyudad gisaysay niini nga tulo ka mga lalaki ang mihangyo kaniya nga mopakyaw sa iyang sakyanan paingon sa siyudad sa Marawi, Lanao del Sur.
Tungod kay maayo man ang ilang sabot ug nangyawat usab kini og dako nga kantidad iyang gihatod ang mga suspetsado sa maong dapit apan paghidangat sa hilit nga dapit kalit lang siyang gitionan og pistola ug gipangkuha ang iyang mga butang sama sa pitaka uban sa wala matinong kantidad.
Wala pa makuntento ang suspetsado giluba kini makaduha ug gipusil makausa ka higayon.
Tungod kay nagkadugo naman ang biktima ug sa pagtuo sa mga suspetsado nga patay na kini ila kining gibyaan.
Dihang wala na makita ang presensya sa mga suspetsado nangayo og tabang ang biktima ug natayming nga milabay ang mga sundalo hinungdan maoy mitabang niini ug gibalik kini dinhi sa siyudad.
Gidala ang biktima sa Northern Mindanao Medical Center (NMMC) kinsa padayon pa nga giobserbahan sa mga doctor ning panahona hinuon luwas na sa makuyawng kahimtang. (SVB)