DUHA sa tulo ka mga tulisan ang nasikop human gitulis ang usa ka taxi driver niadtong Sabado mga alas 8:00 sa gabii sa Vista Grande Lumbia Road ning siyudad sa Cagayan de Oro.

Si Senior Police Officer 1 Manuel Rivera sa Police Station 8 (PS8) sa Lumbia niila sa biktima nga mao si Virgilio Hallasgo, 50, minyo, taga Puntod ning siyudad ug driver sa Egie Pi Taxi, nagdala og plaka KVT-299.

Gibutyag ni Rivera sa Sun.Star Superbalita nga samtang pagawas gikan sa Lumbia airport si Hallasgo tulo ka mga lalaki ang nipara kaniya ug nagpahatod sa Vista Grande.

Apan pipila lamang ka metros ang kalay-on aron maabot sa Vista Grande kalit lang nga gitionan og pistola si Hallasgo samtang duha sa mga suspek nition sab og kutsilyo.

Mideklarar og tulis ang mga suspetsado ug walay pagduha-duha nga gihatag sa driver ang iyang halin niadtong gabhiona nga moabot na ngadto sa P2 mil.

Apan ang tulo ka tulisan wala makuntento, gipahubo pa niini ang iyang karsones ug sapatos ug gipahapa dayon gipusil ang bukton sa biktima.

Human nakuha ang tinguha, dali nga misibat ang suspetsado agi sa wala matinong direksiyon.

Samtang ang driver dali nga mibalik sa iyang taxi ug nagpatabang sa tag-iya niini hinungdan nga mitaho sa kapolisan sa PS8.

Gidala sab sa Northern Mindanao Medical Center ang biktima aron matambalan ang samad nga naangkon niini.

Matud ni Rivera nga niadtong Domingo, mga alas 5:00 sa hapon duha sa tulo ka suspetsado nga mitulis ni Hallasgo ang nasikop dihang gipahigayon ang man-hunt operation.

Nagtingkagol sa prisuhan ang duha ka tulisan nga mao sila si Edgar Doa-Janolino, 18, ulitawo, taga Landless, Macabalan ning siyudad ug Rodel Bertrudez, 25, minyo, taga Culrai, Puntod ning siyudad.

Samtang padayon nga gipangita ang usa sa suspek nga mao si Jun-jun (bansagon gipugngan), 17, sa susamang dapit.

Kasong robberry ug frustrated murder ang atubangon sa duha ka mga suspetsado nga natigayong pasakaan karong adlawa.