SUPERBALITA CAGAYAN DE ORO

Todino: Ug nakaginhawa ang mga isda

Pro Bono

MURA og imposible mahitabo apan nahimo gyud ang paglimpiyo sa Manila Bay. Apan, phase one lamang kana, panindoton ug limpiyohan pa gyud pag-ayo sa administrasiyon ni Presidente Duterte sa umaabot nga adlaw. Hulaton nato unsay resulta niini.

Lima ka mga presidente ug daghang mga mayor nga ming-agi apan wala gyud malimpiyohi ang Manila Bay. Unsa kaha imong bation nga di ka makapagawas sa imong hugaw sa lawas sulod sa usa ka semana. Unta nasinatian nila na.

Usa sa mabasol sa kahugaw sa palibot kaniadto mao usab ang katawhan nga nagpataka lang og labay sa ilang basura. Kuwang og disiplina.

Niadtong Enero 27, midagsa ang kapin sa 5,000 ka mga tawo nagboluntaryo sa paghinlo sa Manila Bay. Dalaygon kaayo ilang gipakita nga kausa alang sa pagpreserba sa atong kinaiyahan. Nakaginhawa gyud tawon ang mga isda karon.

Apan, ang nakapahugaw gyud sa maong dapit mao kining mga hinugasan ug mga makahilo nga tubig gikan sa mga factory ug mga hotel sa palibot nga gipaagas ngadto sa dagat. Wa gyud tawon pakabana.

Mibahad ug gituman gyud ni Duterte nga sirad-an ug paundangon sa ilang operasiyon kadtong mga establisemento nga magpataka og pabuhagay sa ilang hugaw nga tubig paingon sa dagat. Mao nay gitawag og strong political will.

Niay mga pundok sa walhong komunista nangugat nga ipahunong ang rehabilitasyon sa Manila Bay. Unsay gusto ninyo nga magpasad ang hugaw ug baho sama sa inyong baruganan. Pagkahugaw og utok ninyo.

Mitakod ang pagpalimpiyo nga giduso sa Malacañang. Daghan mga local government units ang nanga-ikag na sab paglimpiyo sa ilang mga baybayon ug kasapaan. Wala pa nako mabatgayi lagi sa atong dakbayan. Mayor lihok na!

Aron bitaw mamintenar kining kalimpyo sa palibot mas maayo hingusgan gyud ang pagsilot niadtong magpataka og labay sa ilang basura. Siyaro di motagam.

Unahon nato kining kusog manigarilyo kay mao na sila ang usa sa labing hugawan nga tawo. Magpataka lag labay sa ilang tinostos ug putos sa sigarilyo. Pastilan!

Ang maayong buhaton bitaw kadtong masakpan nga naglabay og basura – diha sa karsada, estero o baybayon, dili nalang nato pamultahon apan hatagan nato og usa ka sako ug papuniton og basura hangtod mapuno ang sako.

Ug dili motuman sa pagpamunit nan, prisohon og usa ka semana. Way multa nga ipahamtang kay dali ra kaayo na bayran.

Hingusgan pud kanunay nato ang information drive diha sa eskwelahan. Unya dasegon nato ang mga civic organization sa paghimo og regular nga cleanup drive isip serbisyo nila sa komunidad. Sikat kaayo mo ana.

Unya, kining mga walhong pundok nga komunista, hagiton nato nga mag-martsa sila sa kadalanan ipakita ilang dakong pagsupak nga malimpiyon ang palibot. Tan-awon nato kon di ba sila labayon og mga basura. Puyra gaba mo! Pero ato silang respetohan sa ilang pagtuo. Ilaha sab na. Mao na ilang papel sa katilingban!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph