SAMTANG mapasalamaton kita sa Universal Health Care bill nga giduso ni Sen. JV Ejercito ug pirmahanan na lang ni Presidente Rodrigo Duterte, atong nahimamat kagahapon ang usa ka partylist nga ang advocacy mao ang pagpalambo pa sa maong balaod.
Mao kini sila si Atty. Adorlito Ginete, Ower Andal ug Michael Defensor sa Alagaan Natin ang Ating Kalusugan (AnaKalusugan).
Alang kanila, mapalambo pa kining universal health care sa nasud pinaagi sa libreng diagnostics ug mga medisina ug pagdugang sa budget sa Department of Health.
Matod pa, ang mga ordinaryong Pinoy sa kabanikanhan halos dili magpa-check up ug mogasto og diagnostics. Gawas nga mahalan sila, hasol pa kaayo ang moadto sa syudad.
Mao nga kasagaran, magpa-checkup lang sila kon grabi-grabi na ang ilang gibati.
Kon magpa-checkup man, magpunsisok kini sila sa mga libreng medical missions.
Apan kon masugdan og sayo ang siging libreng pagpa-check-up sa mga Pilipino, mas gamay na lang ang masakit.
Kining maong party-list mahimong mag-oversight sa implementasyon sa Universal Health Care bill inig mapirmahan na kini sa presidente ug mahimo nang balaod.
EJERCITO
Mahimuot lang ko nga bisan pa man niining dalaygon nga balaudnon nga giduso ni Sen. Ejercito, naglisod siya og sulod sa Magic 12 sa mga survey alang sa mga senador.
Mas nasulod pa ang iyang half-brother nga si Jinggoy Estrada bisan pa sa bad record niini kay nalambigit sa giingong pagtulis sa pork barrel.
Mas nailhan man gud ang apilyedo nga Estrada kay sa Ejercito.
Ang lang ba. Mopili lang unta kita sa tawo nga dunay klarong kalamposan ug baruganan.
KP VISAYAS
Maayo kay naapil si JV Ejercito sa listahan nga giduso sa Kilusang Pagbabago Visayas. Pito lang kining ilang nasabutan hinuon.
Ang nag-una mao si Dong Mangudadatu, nga paryente sa upat nga nangabiktima sa Maguindanao massacre kaniadtong 2009 uban sa 30 kapin nga mga sakop sa media.
Matod pa, giduso karon ni Dong Mangudadatu ang kalinaw sa Mindanao.
Apan sigurado ko nga mouyon mo nga mas naila pa kini siya nga bayaw ni Genalyn, ang lider sa pundok nga mosang-at unta sa kandidatura alang sa pagka gobernador sa iyang bana nga si Toto Mangudadatu.
Ang ubang naapil sa listahan sa KP mao sila si kanhi PNP chief Bato de la Rosa, kanhi SAP Bong Go, kanhi Senate President Koko Pimentel, Francis Tolentino, ug Sen. Cynthia Villar. (@anol_cebu sa Twitter)