Roldan: Dili away sa relihiyon

NATAY-OG ang kalinaw sa Mindanao niadtong Enero 27 tungod sa pagbusikad sa duha ka bomba didto sa Jolo, Sulu.

Sobra 20 ang gibalitang namatay nga nanimba lang sa Cathedral sa simbahang Katoliko samtang mga 100 samaran nga nagpaayo sa ospital.

Daghang teyoriya nga nitumaw sa pagpamomba nga giangkon gilayon sa Abu Sayyaf ug sa teroristang grupo nga Islamic State of Iraq and Syria (Isis).

May selda na daw ang Isis sa Mindanao tungod sa dakong porsiyento nga Muslim ug sa kaduol niini sa nasud nga Indonesia ug Malaysia diin Islam ang ilang relihiyon.

Sumala ni Presidente Rody Duterte nga duha daw kay magtiayon nga taga Yemen ang suicide bombers. Taud-taod nang walay dakong nahitabong bayolente nga gikalambigitan sa mga Kristiyanos ug Muslim.

Niadtong 1980s daghan sab ang namatay tungod sa bomba nga nanimba sa Easter Sunday mass sulod sa San Pedro Cathedral.

Human niini, nagbinalusay na ang pagpamomba sa pipila ka mosque sa Muslim sa Davao sama sa nahitabo sa usa ka mosque sa Zamboanga City nga gikamatay sa duha nga natulog didto.

Wala pay balita kung kinsa ang naglabay og granada sa maong mosque apan klaro nga ang nagbuhat niini buot buhion ang away sa relihiyon sa Muslim ug Kristiyanos.

Kahibalo kita nga wa pa nahuman ang referendum sa Bangsamoro Organic Law nga maoy moilis sa teritoryo nga gisakupan sa Autonomous Region for Muslim Mindanao.

Dili tanan nga giapil sa listahan sa bag-ong teritoryo ang niuyon nga mahiapil sila base sa inisyal nga resulta sa referendum.

May nag-ingon nga gusto sa Isis nga mahimong Islamic State sab ang Mindanao busa ilang pugson ang mga lugar nga daghang Muslim nga mahilakip sa ilang teritoryo.

Dako ang epekto sa panghitabo. Una sa tanan nimando na si Presidente Rody sa Armed Forces of the Philippines nga lutuson ug pulpugon ang Abu Sayaff/Isis.

Niadtong Dominggo nagpaguwa og hiniusang pamahayag ang Archdiocese of Davao, ug mga lokal nga opisyales sa Philippine National Police ug Armed Forces of the Philippines nga did-an nang magdala og dagkong bag, backpack ug karton sulod sa simbahan.

Ang ubang simbahan may mga pulis pang mohiling sa dala sa manimbahay. Daghan sab nga pamilya nga di na manuroy sa lugar nga daghang tawo sa kahadlok nga may mobusikad nga bomba.

Ingon pa ni Rizza nga usa ka "clairvoyant" nga nakatag-an sa panghitabo sa pagpamomba sa Jolo ug Zamboanga City nga may unom pa ka pagpamomba, kasagaran niini dinhi mahitabo sa Mindanao.

Lisud ug delikado gayud ang atong panahon karon. Apan atong timan-an nga dili kita magpalingla sa gusto nga sabungon ang Muslim ug Kristiyanos. Dili kini away sa relihiyon kung kinsa nga Diyos ang tinuod ug mas gamhanan.

Ato sab nga hinumdoman nga ang tinuod nga kaaway sa demokrasya mao ang terorista nga may kaugalingong interes nga makaangkon og gahum nga walay pagrespesto sa baruganan ug pagbati sa uban.

Gusto sa Abu Sayaff ug Isis nga palayason ang mga "infidel" nga Kristiyanos sa Mindanao aron wa nay makapugong sa ilang pagmando sa kalibutan.

Unta magmaigmaton kita ug mag-ampo sa kalinaw sa Mindanao ug nasud.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph