SA TINGUHA nga masiguro ang malinawon, limpyo, ug malampuson ang piniliay karong Mayo 13, 2019, ang mga kandidato sa dakbayan sa Mandaue ninglagda og peace covenant ug nanumpa alang sa integridad kagahapon, buntag, Pebrero 4, Mandaue City Police office (MCPO) grounds.
Gitambungan kini sa higpit nga magkaatbang karon sa eleksiyon sa siyudad, ang kampo ni Mayor Luigi Quisumbing ug Kongresista Jonas Cortes.
Mainiton ang ng mga isyu nga gipanglabay sa duha ka kampo ngadto sa usag-usa, apan kagahapon. nagkahiusa sila sa pagsuporta sa kawsa sa MCPO ug sa Mandaue City Comelec sa tinguha alang sa malinawon ug malampuson nga eleksiyon sa siudad.
Kompleto ang slate sa matag kampo nila ni Quisumbing ug Cortes atol sa pinirmahay.
Gisaksihan kini sa mga representante sa ubang sektor sama sa National Police Commission (Napolcom), Departamento sa Education (DepEd), nagkadaiyang relihiyon, Department of Interior and Local Government (DILG) ug uban pa.
Gipasabot sa kapulisan ug sa Comelec nga dili pinugsanay ang maong peace covenant signing.
Matud ni Senior Supt. Angelito Dumangeng, Deputy Regional Director For operation sa PRO-7, nga labing una ang MCPO sa tibuok Central Visayas sa City ug municipal level nga nihimo sa peace covenant.
Dugang ni Dumangeng nga mopasalig man og suporta o dili ang mga kandidato nga maningkamot nga mahimong limpyo ang piniliay, sila sa kapulisan ug kasundaluhan ang andam kanunay, mapatuman lang gyud ang kahapsay ug kalinaw.
Ang duha ka kampo ang parehong nipadayag nga limpyo nga piniliay ang ilang tinguha alang sa kalambuan sa Mandauehanon, ug bisan ug sud sa dugay na nga katuigan nga way mga election-related incident nga nahitabo sa syudad, pareho sila nga nakasabot sa tinguha sa MCPO nga mapaubos sa Orange Alert level ang siyudad diha sa Election Watch List Areas (EWAS).
“Mapasalamaton ko nga gipahigayon, kay para nako we are all leaders, magpapili mi, nya para nako, leadership is not about the next election, it is about the next generation. Gikinahanglan ang malinawon nga election maoy yawe sa malambuon nga dakbayan,” asoy ni Cortes.
“Dako akong pasalamat, for hosting today’s integrity pledge, I am happy to note that we are the only ticket in the City of Mandaue without any people who have been link to the drug trade, and I hope of the other candidates will make sure that they will put aside their activities in the drug trade and in protecting drug individuals, so that we can ensure that the will of the people and Mandaue will not be influenced,” pamahayag ni Quisumbing.
Giangkon ni Atty. Anna Fleur Gujilde, Mandaue City election officer, nga adunay mga independent nga mga kandidato ang wala nitunga, hinuon mahimo ra pa sila nga moapas og pirma sa kasabutan.
“This peace covenant is symbolic, it shows the support andcommitment of candidates and tanan stakeholders sa ilang pag-ensure nga atong election dire malinawon, limpyo hapsay and at the same time ang support sad nila not just to comelec but also to PNP, AFP,” pasabot ni Gujilde.
Samtang nipadayag usab ang pangulo sa kasundaluhan sa Central Command nga mopadugang sila og pwersa gikan sa Navy ug Airforce, alang na sa umaabot nga piniliay.