DUHA ka mga bata nga nagpangidaron pa og 13 ug 3 anyos, lakip na ang tulo pa ka semana nga masuso, gi rescue sa mga sakop sa Women and Children’s Protection Center (WCPC-7) ug International Justice Mission sa lungsod sa Ronda.
Ang mga bata giingong gibaligya sa internet ang hubo nga mga hulagway sa 32 anyos nila nga inahan.
Natanggong na karon sa Cebu Provincial Police Office detention cell ang inahan human masikop sa mga sakop sa WCPC-7 ala 1:45 Lunes sa hapon, Pebrero 4, nunot sa kasong cyber pornography.
Wa nganli sa kapulisan ang suspek sanglit mailhan ang mga bata nga iyang mga anak.
Ang mga bata giingong iyang gipahubo atubangan sa camera sa iyang cellular phone.
Lunes sa buntag, Pebrero 4, unang gi-entrap ang 32 anyos nga ginang sa lungsod sa Alcantara sa kapulisan.
Gisunod dayon nila pagka hapon ang pag serve sa search warrant nga giluwatan ni Judge Ramon Daomilas sa Regional Trial Court (RTC) Branch 11 sa syudad sa Sugbo sa ilang balay sa Barangay Poblacion, lungsod sa Ronda.