GIKUMPIRMAR ni Misamis Oriental Governor Yevgeny Vincente Emano nga kabahin na si Police Chief Inspector Maricris Mulat sa buhatan sa Misamis Oriental Provincial Jail (MOPJ) isip assistant jail warden.
Sulod sa unom ka tuig nga iyang adminitrasyon nahatagan og kaarangan ang sulod sa prisuhan kay wala nay kagubot nga nahitabo.
Ang pagkadugang ni Mulat kinsa naila nga lakip sa most outstanding police woman sa nasod ang dako kaayo og tabang sulod sa prisuhan.
“Makatabang siya og dugang katin-aw, dugang kasihag sa pagpadagan sa provincial jail nga dili na masubli ug masudlan sa ginadili nga druga ug maareglar ang atong binilanggo kay isip usa ka babae nagtuo ko nga iyang pwedeng madala iyang ininahan nga pagdumala diha sulod sa prisuhan,” matud ni Emano.
Dugang niini nga sayo miretiro si Mulat ug gipili niining motrabaho sa MOPJ taliwala paman nga daghan ang buot mokuha niini nga laing ahensya.
Kahinumduman nga ilado si Mulat sa mga dagkong operasyon labina nga tigpuhag kini sa mga drug dens, tigsikop sa mga dagkong personalidad nga nalambigit sa ginadili nga druga samtang nahimong station commander dinhi sa Cagayan de Oro City Police Office.
Uwahing operasyon niini mao ang pagkasikop sa usa ka taxi driver nga nakuhaan og balor P2.3 milyon nga gitouhang shabu.