GIUSA-USA ni Misamis Oriental Governor Yevgeny Vincente Emano ang mga tourist destination nga maoy dapatan sa kantidad nga P159 milyon alang sa turismo sa Misamis Oriental.
Sugdan kini sa pag-ayo sa naguba nga jumping point sa Agutayan Island niadtong nasinati ang bagyo sa niaging tuig.
"We will repair sa nadamage nga jumping point sa Agutayan white island kadtong nasinati ang bagyo," matud ni Emano sa interbyu sa SunStar SuperBalita.
Kung matibawas sab dayon ang papeles sa Alubijid Hot Spring mao kini ang ikaduha sa i-develop.
"Kung mahuman ang papel sa Alubijid hot spring atong madapatan og pundo," dugang sa gobernador.
Laraw sab niini nga himoan og dalan ang Mt. Anggas nga swak kaayo sa mountain climbing o trekking diha sa lungsod sa Gitagum kon diin dagsaon na kini karong panahona.
Malaumon sab si Emano nga kung makab-ot ang ilang memorandum of agreement sa kagamhanan sa Gingoog pinaagi sa liderato ni Mayor Marie Guingona iyang i-develop og samot ang Tiklas Falls nga lakip karon sa usa sa nag-unang tourist attraction sa siyudad sa Gingoog.
"Hopefully kung makakab-ot pod mi sa memorandum of agreement kang Mayor Marie sa Gingoog sa ilang Tiklas falls kay gusto namo idevelop kana nga mga tourist spot," matud niini.
Samtang ang nakaandam na nga pundo daan aron pagpatsada sa Flight 387 Shrine ang posibleng mahitabo sa bulan sa Hulyo kon diin nahimutang taliwala sa lungsod sa Claveria ug siyudad sa Gingoog.
Matud niini nga ang mga lingkuranan nga mainitan ang butangan og atop. Ang gabok na nga tulay sa entrada nga bahin ang usbon.
Gubaon na usab kadtong katulganan ug ayuhon ang comfort room nga pwede dayon maligoan.
Plano mao niini ang pagbutang og café sa maong shrine hilabina nga daghan kaayo mga mountaineer nga diha gapanukad sa dapit usa mosaka sa bukid.
Ang kita niini ibutang usa sa trust fund samtang nagpadayon ang kaso sa boundary dispute sa lungsod sa Gingoog ug Claveria ug kon kinsa ang modaog niini maoy makaangkon sa kita sa shrine.