GIREKOMENDAR sa Mandaue City Police Office (MCPO) nga ipaubos sa paraffin test ug autopsy ang patay’ng lawas sa range officer nga giingon nga naghikog sulod sa usa ka buhatan sa may North Reclamation Area, Lunes sa udto, Pebrero 4.
Bisan kon ang pamilya ni Mario Caballes kombinsido nga naghikog gyud ang biktima, human nga giingong’ nakamatikud na sila og susama’g depress kini sa niaging mga adlaw, gitug-an ni Senior Superintendent Julian Entoma, ang director sa MCPO nga angay lang gihapon kini nga ipaubos sa autopsy ug paraffin test.
Si Caballes, 64, taga Barangay Guadalupe, sa dakbayan sa Sugbo, ang napalgan na nga patay human gikataho nga nagpusil sa iyang kaugalingon sulod sa buhatan sa usa ka meat importer alas 12:15 Lunes sa udto, Pebrero 4, sa Big Blue North building, sa may North Reclamation Area, Barangay Subangdaku, Mandaue City.
Matud ni Entoma nga sa gihimo nga pakisusi, giingon nga kanunay nga mag-adtuan ang biktima sa maong buhatan, human usab nga kini ang gibaligyaan niini sa yuta.
Giingon nga niadtong’ tungura aduna kini tuyo sa manager, apan giingon nga wala diha, ug adunay gikuha nga dokumento.
Sa pagsulod pa lang niini, giingon nga nakabantay na ang ubang mga trabahante nga nagkurog na ang kamot niini, sa dihang nahatag na kaniya ang usa ka dokumento sulod sa opisina.
Giingong gipangutana pa kini kung “okay lang,” sa paggawas sa assistant supervisor nga si Jennilyn Surpamones sa buhatan, pipila ka minuto mao nalang ilang nadunggan ang usa ka buto sa armas.
Samad pinusilan ang naangkon niini sa iyang tuong dapit sa ulo. Giingong 45 kalibre sa armas ang gigamit.
Samtang usa ka trabahante nga anaa sa sunod nga kwarto ang giingong natapsingan sa nilapos nga bala.
Giila ang biktima nga si Crissia Lapinid.
Dali usab gidala si Lapinid sa iyang mga kauban sa trabaho sa tambalanan, human makaangkon og samad kilid sa iyahang mata.
Ang biktima anaa na sa maayong kahimtang.
Dugang ni Entoma nga personal nga problema kalabot sa yuta ug uban pang property ang gibutyag sa abogado ug ubang pamilya niini nga maoy hinungdan sa depresyon ug posibleng rason sa pagkutlo sa iyang kinabuhi.
“Mao gyud na gi-recommend sa atong mga investigator, ang pagpapaubos og paraffin test ug pa-autopsy, nga subject sa approval sa family,” matud ni Entoma.
“Kombesido sila nga suicide, sila man daw naka-obserbar nga ingon ato na ang actuation, mao nadawat nila ang nahitabo,” dugang ni Entoma.
Apan bisan pa man nga wala’y foul play sulod sa establisemento nga nakita ang kapulisan, matud ni Entoma nga mohimo pa gihapon sila og dugang pakisusi, sama nalang kon unsa kadto nga dokumento ug kon aduna ba’y closed-circuit television camera sa buhatan aron masusi ang mga panghitabo sa iyang pagsulod, hangtud na sa giingong nga nagpusil sa iyang kaugalingon si Caballes.