MOKABAT 34 ka mga units sa Davao Metro Shuttle (DMS) Bus ang gisuspenso sud sa 30 ka mga adlaw nga di ka biyahe gumikan sa gikalambigitan niini nga disgrasya sa Kilometer 92, Barangay Magsaysay, Nabunturan, Compostela Valley, Lunes, Pebrero 4.
“Nasa preliminary investigation namin, it was found out na yung front right tire ng Metro Shuttle nag-explode kaya nag-encroach sa lane ng Bachelor Tours Bus,” sulti ni lawyer Cattleya Acaylar, Land Transportation Franchising and Regulatory Board (LTFRB)-Davao director, sa pakighinabi sa Sunstar Davao, Martes.
Dugang ni Acaylar nga kulorom ang rota sa nasampit nga unit sa DMS gumikan ang orihinal nga rota niini mao ang Davao-Tagum apan ang disgrasya natigayon didto sa Nabunturan.
Nakasuwat sa “Show Cause Order with Preventive Suspension” gikan sa LTFRB-Davao nga patubagon sud sa 30 diyas ang DMS sa maong hitabo.
Giingon nga ang suspensyon sa maong mga units magdepende sab kini sa resulta sa pagdungog sa reklamo.
Pito ang namatay ug mokabat 29 ka mga pasahero ang angol sa natigayong bangga tali DMS ug Bachelor Tours. (Randie Comilang)