DOMINGGO. Alas dos sa hapon. Miduol si Joseph sa iyang mama ug papa nga nagtupad pagpanglingkod samtang nagtan-aw og TV show sa ilang sala.
“Naunsa na hinuon ni Pa, Ma? Kita na man hinuoy ginganlan og gagmay og utok sa social media!” matod ni Joseph nga mipakita sa iyang selpon sa iyang Papa Joaquin ug Mama Raquel. Bag-o lang siyang migawas sa iyang lawak ning sayong kahapunon. Pustorawo kaayo ug humot nga agwa kay mamisita sa iyang gipanguyaban. Nagtrabaho siya sa Green Meadow Bakeshop isip panadero.
“Unsa na, Dong Joseph, ang naa’s imong selpon?” ni Joaquin nga midawat sa selpon nga gitunol sa anak.
“Patan-awa sab ko, Dong,” ni Raquel. Nadisturbo ang ilang pagtan-aw sa ASAP.
“Ni-chat man ni si Roland bahin nato. Ginganlan man tag ‘pamilyang gagmay’g ulo!’ ni Joseph nga masuk-anon.
Mipahiyom lang ang magtiayon, imbes nga masuko.
“Unsa man, Pa, Ma, kulatahon ko kana siya? Ig-agaw ko na ug pag-umangkon ninyo. Apan wa na may tahod. Di na man makig-paryente!” ni Joseph nga mihana og hubo sa iyang nindot nga polo aron sulngon ang ig-agaw nga nagpuyo sa balay nga duol kaayo sa ila, sa sitio Amiraw.
Gikulbaan ang magtiayon sa lihok sa ilang bugtong anak. Mga retirado silang pulis. Si Joaquin kasamtangang konsehal sa ilang lungsod, chairman sa committee on peace and order. Sa tanang barangay sa ilang lungsod si Joaquin nag-house-to-house og pamisita, nanghangyo nga moundang na unta ang mga tawo sa bisyo sa ginadiling drugas. Nasupo na hinuon si Joaquin sa mga pilusopo. Moingon man ang kadaghanan, “Mamadlong ka namo. apan wa ka kabadlong sa imong pag-umangkon nga silingan kaayo nimo!” Kadaghan na siya manglipaghong.
Wa gyud mobadlong si Joaquin kang Roland. Apan ang tig-deliber og shabu nga nag-motorsiklo maoy iyang gibadlong. Giingnan niya, “Sunod higayon kon mobalik pa ka dinhi, dakpon na tika. Aron di ni mahitabo, adto mo mag-abot sa halayong dapit aron dawaton ni Roland ang imong delivery. Giganlan silag mga gagmay’g utok. Wa maghunahuna nga ang nagbisyo sa drugas maoy makupsan og utok.
Si Roland anak sa pagka dalaga ni Evelyn, manghod ni Joaquin. Tua sa Amerika magpuyo kay naminyo og Amerikano ug nakatrabaho sa usa ka dakong hotel didto. Buhong si Roland sa kuwarta ug pinatuyangan sa gusto sa inahan. Wa siya kahuman og kurso tungod sa barkada. Nahimong drug den ang balay ni Evelyn nga pinatukod niya alang sa iyang pinanggang anak.
“Ayaw na lang na siya tubayi, Dong Joseph. Nasayod man ta nga way motuo anang iyang gipang-post sa Facebook. Tungod ug alang sa akong igsuon nga si Evelyn, di na lang nato hilabtan si Roland. Unsay dautan nga mahitabo niya tungod sa iyang bisyo, bahala na siya. Maayo nang way ikasulting dautan ang iyang inahan ngari nato. Kon maguol man unya si Evelyn, maayo nang dili kita ang hinungdan,” matod ni Joaquin.
Nagpangusmo si Joseph. Nangagho. Nanghupaw. Unya mikalma.
“Padayon na lang sa imong lakaw. Humot ug espoting na kaayo ka,” ni Raquel nga nagpahiyom.
“Nia pay lain, Dong Joseph, nga akong itambag nimo. Ayaw pakig-away sa baboy, kay kamong duha maoy magkahugaw. Unya ang baboy malingaw. Busa, ayaw hatagig kalingawan ang baboy,” ni Joaquin nga naggunit gihapon sa selpon sa iyang anak.
Mihangad sa kisame si Joseph ug mipahiyom. Unya gihapsay niya pagbalik ang iyang polo kay nagum-os paghana niyag hubo kaganina.
“Sige, Pa, Ma, adto na lang ko,” ni Joseph.
“Ang imong selpon, ay’g kalimti,” ni Joaquin nga mitunol ini sa ulitawo. Gidawat ni Joseph ang selpon dayong lakang padulong sa pultahan. (KATAPUSAN)