SECTIONS
Monday, June 24, 2019
PAMPANGA

Garcia: Pamanyalubung king Banwa ning Babi (Ushering in the Year of the Pig)

Kapisik

“At inyang dating Ya king sumangid, king balayan ning Gadarenes, adwa lang misaniban dimonyu a lalaki ring sinagana Kaya, linwal la karing kutkutan, asno kabangis inya alang milabas king dalan ayta. At keyakit lang ginulisak ngara,’Nanu ing gawan mu kekami, O Anak ning Dyos? Dintang ka keni bang parusan Mu kami bayu dating ing panaon?’ Ngeni ating kawan da ring babi a mamangan king marayung bagya karela. At ding dyablu megmakalunus la Kaya, ngara, ‘Nung palwalan Mu kami, ilikas mu kami karing kawan ding babi.’ At ngana karela, ‘Ume kayu!’ Inya sa’t linwal la at minta la karing babi, at lawen la, ding laganas a kawan memiragli lang pakuldas king malalam a pampang papunta king dagat at mengalumud la king danum.”

~Mateu, Dangka 8: Sunis 28-32

(Matthew 8:28-32)

***

King banwang 2019 o kasalungsungan dintang ya napun ing awsan dang Banwa ning Babi. Ya pin ita ing kapat a libu pitung dalan labing anam a banwa ring Isik. Agpang king Pamanula da ring Isik king kapalaran, ing tandang pamanula king banwang 2019 ya pin ing babi. At iti ing babing pangyatung babi, at ing kule da kakule ne ning gabun inya sa’t ing banwang iti mayayus yang Banwa ning Babing Pangyatu.

Ing mumunang aldo ning Pamanula ding Isik a pamanula king pabanwa ya pin ing Bulan ning Tigri.

Agpang king kapanwalan king Pamanula ding Isik, ing Babaing Yatu makasuglung ya king gabun asikan. Ing babi atin yang Lalaking Danum a maki-Lalaking Dutung. Ing Lalaking Danum kanu ilug ya at ing Lalaking Dutung matas yang impun o dutung a paglayag. Ing tanda ning Babaing Yatu metung yang ilug a daragus king gabung asikan. Malyaring magbunga yang albug.

Ing babi ya ing ka-labing-adwang tanda ning pamanula ring Isik. Ing Bulan ding Babi makasuglung ya king mumunang bulan ning dimla. Nung ing swerting sangkap mu ning kekang karatula ning pangabayit mu king Isik danum ya, kanita ing Babi magdala yang swerti keka king 2019--masalese ing mangapalyari keka king banwang 2019.

Iti mu naman ing tanda ning dinat, katakawan at kasalawlan at iting babi agyang magkasat-kasat ya king burak at laput asne pa mu rin kaswelu uling likas kaya iti. Masipag ya iting mamangalkal karing mangarinat a bage bang kanan na niti. Ing buri na ila pin ding mangarinat at nung makilibe ka kaya king mayap a bage siguradung itaya na pati anak na ba’yang manyambut o magtagumpe king nanu mang paralan. Ing bye na ning bai ya pin mu ing pamamangan alang patugut. Manyibsiban ya naman king malinis dapot ala kaya nung manyibsiban ya king basura.

Ing kayapan na ning babi payapa ya. E makipate agyang kareng kalupa nang babi uling payapa ya bye kabud atin yang asasabsab, o alalaklak at agyang nanung marinat, mabangnas at mabuluk—maswelu ne king bye na. Asna n’ya naman kaburi king gamus. Nung gamusan me atsan agyang karen mung kuku mung bitis o kapirasung dutung a apangamus kaya tambing neng magkera bang pabalaus keka ing pamangamus kaya.

Ing pangaburi na king darak at semutanan tagan a pamangan o kanyo karin ya mekilala mu naman. Asne tagana kababyan ing babi inya pati dinat kakanyamanan ya king pamaglaklak. King panyatang na pa ning banwang iti meyakit na ing dakal a kababyan king balen tamu at karing aliwa pang bangsa mabilug a yatu.

***

Dake Talabaldugan:

gapos/gapus – (palagyu) pamanali kareng adwang gamat a mikukurus, madalas makapaysinggulut. English – manacle; handcuffs, rope tied around the arams or hand. Eaten by weevils or termites inside. Alimbawa king pamangamit: “Pekatigik de gapus ing babi inya mengaggiting ya at menuling balat gamamt at bitis a migapus.”

garalgal – (palagyu) galukguk, gagalgal a aksing. English – gargling sound, in the throat; noise caused by loose parts in a machine. Alimbawa king pamangamit: “E bisang milako ing garalgal ning akmulan ning sisinding sigarilyu inya makarine ya kanung kayabe sabi ning kapaglolo na.”

garáy – (panguri) biray. English – “viray”, an ancient sailboat; boat used in battle. Alimbawa king pamangamit: “Mekakulkul lang garay king pampang ning Mawli at matwa ya pa kanu king panyatang ding Kastila keti Kapampangan.”

garil – (panguri) balid, gaguti, gagu, kaka, utal. English – defective in pronounciation. Alimbawa king pamangamit: “Inya siguru garil ya pamagsalita ing bayung datang a dayu uling pasalikut yang minum alak.”

garing – (panguri) menibat keng tusuk king pambuk ning elepanti. English – ivory. Alimbawa king pamangamit: “Mababating ya ing baul king sakristya a kisnang garing inya asne karagul a lumbe ing pari tamu.”

***

KAPAGMASUSYAN KAPAMPANGAN

Lwid ing adobeytan ding adwang mibantug at metangal a Talasulat Kapampangan! Deti ila ri: Jose P. Fausto—abugadu, talapatnugut (editor), talasulat Kapampangan at Kastila, miyalal anting representante ning Kadwang Distritu ning Indung Kapampangan magmula inyang 1934 anggang 1941 at kapamilatan nang Governor Sotero Baluyut, megi yang sekretaryu ning DPWC at miyatasan anting governador ning lalawigan kapamilatan nang Pres. Manuel L. Quezon; at Amando Dayrit, meging kolumnista ning Tribune bayu mika-gerang Apon at mituring anting “enfant terrible” king Pampanga High School king pamag-memorya na king Webster English Dictionary at mika-galal anting outstanding young man in Literature.

***

PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan-panyulat a misulat king pigmulan at tune kulitan kambe ning dalise at mapagmasabal a pamisip at parasan.

Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph