PROTEKTAHAN ni Cebuano mixed martial arts fighter Allan Albindo sa Yaw-Yan ArDigma Cebu ang iyang limpyong rekord sa iyang pagpakigbatok kang Odie ‘Transporter’ Lejarde sa ‘Sogod Unleashed’ fight card karong Biyernes sa Sogod gymnasium sa Sogod, Cebu.
Si Albindo, kinsa wa’y pilde sa nag-una niyang lima ka mga away, usa sa mga sumosulbong nga fighters nga ubos sa paggiya ni Yaw-Yan ArDigma Cebu CEO Master Benigno ‘Ekin’ Caniga.
Gihulagway ni Master Ekin nga gawas sa iyang abilidad, grabe moensayo si Albindo hinungdan nga masaligon siyang mopatigbabaw kini ning maong tahas.
Gawas kang Albindo, aduna pa’y laing tulo ka Yaw-Yan ArDigma Cebu fighters ang mopakita og aksyon sa promosyon batok sa lainlaing kontra.
Kini mao sila si Clint Bahala, Ken Rivera ug teen sensation Josh Ybañez.
Aduna pa'y dugang mga parisan nga magkulatahay sa promosyon. (ESL)