MGA duwa karon:
4:30 pm- Alaska batok Columbian Dyip
7:00 pm- San Miguel batok Blackwater
Mobangon og suway ang San Miguel Beermen gikan sa talagsaon nilang duha ka sunodsunod nga kapildihan nga nasinati sa ilang pagpakigbatok sa Blackwater Elite sa main game karong gabii sa Philippine Basketball Association (PBA) Philippine Cup sa Mall of Asia Arena sa Pasay City.
Ang Beermen gikan sa duha ka sunodsunod nga kapildihan batok sa Talk N’ Text KaTropa, 93-104, ug Rain or Shine Elasto Painters, 98-108, nga nagpatagak kanila sa 2-3 nga rekord.
Mao kini ang labing unang higayon nga nakasinati og duha ka sunodsunod nga kapildihan ang Beermen sa Philippine Cup sa miaging lima ka tuig.
Napungot man tuod ang Beermen nga nasagunsonan sila’g pilde apan wala kini nakapaubos sa ilang moral.
“Hindi pa naman huli ang lahat. Magre-regroup kami kasi hindi maganda yung talo. Depensa daw. Tignan natin kung maaayos natin next game,” matod ni Arwind Santos, usa sa mga sinaligan sa Beermen.
Alang sa sinaligang sentro sa Beermen nga si JuneMar Fajardo, kinahanglan siyang mobawi sa dili niya maayong gipakita sa miaging mga duwa sa Beermen.
“Kailangan kong bumawi at mag-bounce back,” matod ni Fajardo, kasamtangang 5-time MVP.
“Struggling ako. Ako yung tinitignan ng mga teammates ko, pero hindi ko sila na i-lift. Pag pangit ang laro ko, malaki ang chance talo kami.”
Ang Elite kasamtangan sab nga nagsalimoang ug naghupot kini’g 1-3 nga rekord.
Sa laing bahin, ang Alaska Aces mosuway sab og bangon human sila nasubhan og dakong kapildihan sa ilang pagpakigbatok sa nagkakuyaw nga Columbian Dyip.
Ang Aces nasugamak sa 72-85 nga kapildihan niadtong Dominggo sa labing una pa lang nilang duwa sa komperensiya.
Apan ning sangkaa, ang Aces padayon nga mokombati nga wala sila si Vic Manuel, Jayvee Casio, Simon Enciso ug Kevin Racal, nga pulos adunay angol.
Ang Columbian Dyip, nga adunay 2-3 nga rekord, nakitaan og dakong kalambuan sa ilang puwersa basi sa ilang kasamtangang gipakita sa komperensiya.
“Watching Columbian I agree with (NLEX) coach Yeng (Guiao) that this team is for real,” asoy ni Alaska coach Alex Compton.
Ang Columbian Dyip magsalig og maayo sa ilang No.1 rookie nga si CJ Perez, kinsa nag-average og 17.8 puntos ug 7.6 rebounds. (ESL)