DI MOMINUS sa 200 ka mga balay sa Barangay Ermita, Dakbayan sa Sugbo ang naugdaw sa sunog sa Martes sa hapon,Pebrero 5.
Gibana-banang P3 milyunes ang danyos sa sunog nga nilanat og dul-an sa tulo ka mga oras.
Ang sunog nakaapekto sa di mominus 500 ka mga pamilya, matod ni Ermita acting Barangay Captain Efe Rupinta.
Ang sunog mikatap sa tulo ka mga sitio sa Barangay Ermita nga mao ang Bato, Pig vendors ug Katsilaan.
Sumala ni SFO3 Emiliano Daño, Cebu City Bureau of Fire Protection Investigator, nga ang maong sunog nag sugod ala 1:15 sa hapon ug giisa sa ika duha nga alarma alas 1:19 sa hapon.
Pag-abot sa ala 1:33 sa hapon, giisa na kini sa Task Force Bravo.
Gipasaka kini sa mga awtoridad ngadto sa General alarm pasado alas 2:22 sa hapon.
Ang task force Bravo mao kini ang pinakataas nga alarma, nagpasabot nga mas nanginahanglan pa og dugang mga fire trucks gikan sa mga lain distrito.
Nakontrolar kini mga pasado alas 3:07 sa hapon.
Aduna say natala nga nasamdan nga giilang sila si Worky Cerelles, Wendell Tecoloy, Ricmar Ando, Wendell Tacoloy, Vincent Amahan ug Jommel Milan, menor de edad.
Si Daño mibutyag nga naglisod sila sa pagkombate sa kayo tungod sa kahuot sa maong lugar ug kasikit sa kabalayan.
Nitataw si Daño nga base sa ilang inisyal nga imbestigasyon, ang sunog nagsugod sa ika duhang andana sa panimalay ni Ronron Sarmiento, apan padayon pa nilang gisuta ang hinungdan niini.
“Ari nagsugod sa ilahang Ronron Sarmiento, under investigation pa og unsa gyud ang hinungdan sa sunog,” matod ni Daño.
Si Victoria Obaob,53, nitataw nga usa ka 5-anyos nakit-an sa ilang silingan nga nagduwa.
Mao kini ilang gituohan nga sinugdanan sa kayo.
Si Obaob nagkanayon nga gidala sa tambalan ang singko anyos nga bata kinsa gituohang mipasiugda sa sunog.
Apan si Jackie Espinosa pares ni Ronron Sarmiento ug kinsa inahan sa singko anyos nga bata mihimakak sa maong alegasyon.
“Para nako, dili gyud sa among balay nagsugod ang sunog kay ang tag-iya atong atbang sa among balay dako na og sunog unya pag-abot nako among balay wa kaayo nasunog. Akong gipangutana akong anak kon nag duwa ba og posporo unya ni ana man siya nga nalibang ra kuno siya. Kay kon sa amoa pa to, kon nag duwa pag posposro among anak, naapil unta siya og sunog. Unya wala man, wa man siya’y paso,” matod ni Espinosa.
Sigon sa acting Brgy. Captain sa Ermita nga si Efe Rupinta nga mga nasunogan ibutang sa Ermita Sports Complex ug sa City Central School-Ermita Extension.
“Ang atong evacuation naa diri sa Ermita Sports Complex ug atong eskwelahan diri sa luyo (City Central School-ermita Extension), thankful kaayo mi sa taga DSWS kay niabot gyud sila dayon which is nag arrange nami sa nag pawng pa lang sa kayo nag arrange nami daan,” subay niya.
Padak-an
Padak-an sa Division for the Welfare of the Urban Poor ( DWUP) ang road-right-of-way sa sityo Bato sa ilang ipahigayon nga re-blocking.
Si Genevieve Alcoseba, pangulo sa DWUP, niingon nga base sa kasinatian, naglisod ang mga tawo ug mga bombero pagresponde sa sunog gumikan sa hagip-ot nga dalan.
Iyang giingon nga ilang tan-awon ang porma ug sukod sa gipatuman nga re-blocking niadtong 2013 human usab naigo sa sunog ang maong lugar.
Si acting barangay captain Efe Rupinta ug suspended barangay captain Mark Miral nanawagan ngadto sa mga Sugbuanon kinsa adunay ikatunol sa pagtabang sa mga nasunogan. (Kiziah Marie T. Suello, USJ-R Intern/AYB/PAC)