MAGTIAYON nga nailang big-time drug pusher sa Pasil apan nag tago-tago na human gipangita sa kapulisan nadakpan sa buy-bust operation sa Pardo Police Station sa Borbajo street, Barangay Talamban, syudad sa Sugbo alas 5:30 Miyerkules sa buntag, Pebrero 6.

Ang mga suspek mao silang Arthur Cajes, ug asawa nga si Sheryl, taga Lawis, Barangay Pasil, syudad sa Sugbo.

Nakuhaan silag 55.4 gramos sa gituohang shabu nga mobalor og P360,100 base sa Dangerous Drugs Board (DDB) value.

Matod ni Chief Inspector Regino Maramag, hepe sa Pardo Police Station, nga dugay na nila nga gipangita ang magtiayon human sila gitumbok nga hagbunganan sa illegal nga drugas ni Romy Ramas, giila nga drug lord sa Metro Cebu.

Human sila nga gipangita sa tanang operatiba sa kapulisan sa syudad sa Sugbo bisan asa nalang motago. Sila naabtan sa Barangay Talamban.

Si Ramas nabilanggo sa Mandaue City Jail, apan giingong nagpadayon sa iyang illegal nga negosyo.

Si Ramas giingong makabaligya og 10 kilos nga shabu sa Central Visayas matag semana.

“Ang amo ana mao si Romy Ramas naa sa Mandaue City Jail. Ang laro niya moabot sa 10 kilos per week ha,” matod ni Maramag.

Sa wala pa masikop si Ramas, ang magtiayong Cajes ang drug player niini sa barangay Pasil.

Di lang sa syudad sa Sugbo maabot ang supply niini tungod kay mahimong motabok pa sa Bohol ug mga silingang probinsya sa Sugbo.

Nakuha nila ang binayloay sa mensahe sa cellular phone nilang Ramas ug Arthur Cajes diin dinagko na nga transaction ang ilang gihisgutan nga miabot na sa 10 ka kilo ang mabaligya matag semana.

Sa nakuha nga kasayuran gikan usab sa cell phone niini, si Ramas konektado sa mga Chinese national nga gi raid sa mga operatiba sa kapulisan sa Luzon.

Nasakmitan ang mao nga mga langyaw og 200 kilos sa gituohang shabu nga mobalor og dul-an sa P2 bilyon.

Gipaubos na karon sa imbestigasyon ang magtiayong Cajes alang sa mga follow up nga anti drug operation ilabi nga nakuha nila ang ubang mga ngalan sa mga big time drug player sa tibuok Sugbo.