MOBALOR og P1.7 million sa kagamitan sa pag-refil sa mga butane canister nasakmit sa Criminal Investigation and Detection Group (CIDG) 7 sa sitio Libo, Barangay Tayud, lungsod sa Consolacion alas 2 sa hapon sa Martes, Pebrero 5.
Upat ka mga trabahante ang naaktohan nga nag refill sa mga butane canister ang gipang posasan.
Kini giila nga sila si Pedrito Octares, 34, taga Brgy. Santiclan, Danao City; Jerwin Capuli, 29, taga Brgy. Pili, Danao City; Elesar Angus, 27, taga Brgy. Palanogan, Mahaplag, Leyte; ug Daniel Calvo, 34, taga Sandayong Norte, Danao City.
Nakuha sa kapulisan ang 13,484 ka empty canisters ug 1,358 nga aduna nay sulod nga liquified petroleum gas (LPG) nga canisters.
Lakip sa nakuha ang 50 ka buok nga 50 kilogram nga Solane LPG tanks; 24 ka 50-kilogram filled Phoenix LPG tanks; 56 ka buok nga way sud nga Solane LPG tanks; 51 ka buok nga 50 kilogram Phoenix LPG tanks; 24 ka buok cartridge type refiller; lima ka digital nga timbangan; 12 ka portable gas stove; usa ka airtac refiller machine Model: 4A320-08, ug uban pang mga kagamitan.