USA unta sa mga pulis nga ipadala sa Lanao del Norte alang sa augmentation sa plebisito sa Bangsamoro Organic Law niadtong Sabado, Pebrero 2, ang mitalaw ug mipili nalang nga mo resign sa sebisyo kaysa ipadala sya sa Mindanao.

Ang maong pulis giila ni Chief Superintendent Debold Sinas nga si Police Officer (PO) 3 Karl Adlwin Belandres Osorio nga taga-lungsod sa Dalaguete apan kasamtangan nga gidestino sa Regional Mobile Force Battalion (RMFB)-Central Visayas.

Si Osorio apil unta sa ipadala sa Lanao del Norte uban sa 329 ka personnel sa RMFB apan mibalibad kini sa iyang mga labaw ug pilion nalang niya nga mo resign.

Dali nga mi-aprobar si Sinas kay alang niya, dili kini maayo nga kinaiya sa usa ka pulis nga dili motuman sa usa ka mando ug makahatag usab kinig dili maayong imahen sa kapulisan.

Gimandoan dayon ni Sinas ang Personnel Division nga iproseso ang tanang dokumento ni Osorio aron mahatag usab ang iyang benepisyo sama sa iyang wala magamit nga leaves.

Naa matod pa sa maayong kondisyon ang mga pulis sa Lanao del Norte bisan pa man sa pag-ulbo sa bomba gahapon sa maong probinsya.

Gikatakdang mobalik ang 329 ka RMFB personnel karong Biyernes, Pebrero 8.