NAGPAUWAN og 19 ka three-point shots ang host Indiana Pacers aron ilubong og taga liog si LeBron James ug ang Los Angeles Lakers, 136-94, kagahapon sa National Basketball Association (NBA).
Ang 42 puntos nga pagkalubong maoy labing dakong kapildihan nga naangkon ni James gikan sa iyang pagsulod sa liga 16 ka mga tuig na ang nakalabay.
Nagkanayon si James, kinsa 4-time MVP, nga gawas nga nangigo ang Pacers sa three-point land, ang ilang turnovers maoy usa sa dakong hinungdan nga nasugamak sila sa dakong kapildihan.
“They scored 33 points off our 19 turnovers and that was from the beginning of the game. We can’t play from behind like that,” matod ni James.
“I think it (the jet lag) hit us. That first game flying across the country looked like it had a lot to do with it, but we didn’t come out with the defensive mentality we had the last time we played them and they made us pay for it.”
Dihang nagduwa pa si James sa Cleveland Cavaliers ug Miami Heat, kaduha na sab siya nakatilaw og grabeng pagkalubong diin parehong miabot og 36 puntos ang biya batok sa Washington Wizards niadtong 2008 ug batok sa San Antonio Spurs niadtong 2013.
Apan alang kang James, mao kini ang labing makauuwaw nga kapildihan nga iyang nasinati.
Nakasukolsukol pa ang Lakers sa 1st quarter apan dihang miabot og dobleng numero nga puntos ang labaw sa Pacers, 37-26, sa sayong bahin sa 2nd quarter, wala na sila motugot nga mapahak kini sa Lakers ngadto sa usa ka numero nga biya.
Padayong nagsaka ang labaw sa Pacers ug adunay higayon nga niabot og 46 puntos ang ilang bintaha.
Nahimo kini sa Pacers bisan wala ang ilang All-Star guard nga si Victor Olapido.
Dihang migawas si james sa nahabiling 2:06 minutos, nakadesisyon si Lakers coach Luke Walton nga dili na kini pabalikon og duwa aron makapahuway og insakto.
Ning puntoha, nabiyaan na ang Lakers og 67-91 ug nakasabot nang daan si Walton nga wala sila’y ikaparang sa kabangis nga gipakitang duwa sa Pacers ning kombatiha.
Si James mibiya sa duwa nga adunay 18 puntos, labing dako alang sa Lakers.
Ning sangkaa, gipamatud-an sa Pacers nga naka-adjust na sila sa pagkawagtang ni Olapido, kinsa dili na makabalik ning maong season human naangol ang iyang tuhod.
Ang Pacers nasugamak sa upat ka sunodsunod nga kapildihan gikan sa pagkawagtang ni Olapido apan nakabawi na kini ug misagunson pagposte’g tulo ka sunodsunod nga kadaugan.
“We look at it as another win, but it does feel good,” matod sa usa sa mga sinaligan sa Pacers nga si Thaddeus Young. “It’s not really about beating them by 42, but we played a complete game.” (AP, ESL)