NAHIGUGMA si Basilio kang Clarita. Dili gyud malangkat sa iyang panumdoman ug handurawan ang panagway niini. Alang kaniya si Clarita lang ang binuhat nga maoy Bathaluman sa iyang kasingkasing. Apan gipangulbaan siya kay duha silang nagkaribal sa gugma ni Clarita. Karibal niya si Ricardo, anak sa adunahang pulitiko sa ilang lungsod ug ambungan kini. Ug bahin kaniya (Basilio) layo ra kaayo siya og kahimtang sa kinabuhi kay kang Ricardo. Anak lang siya sa usa ka manananggot dinhi sa balangay sa San Jose. Patay na ang iyag Tatay Kanor kay nahulog sa sanggutan ug siya maoy mipuli pagka manananggot.Matag adlaw mosaka-kanaog siya sa tag-as ug habog nga mga sanggutan aron pagpamakgot sa bulok sa lubi. Ang amahan ni Clarita usa lang sad ka mag-uuma. si
Ning hapuna karon dihang duol na siya sa balay nilang Clarita nakita ni Basilio sila si Clarita ug Ricardo sa pantawan sa balay nga nag-estoryahay. Ingon nga malipayon kaayo sila ug iyang nakita nga may gihatag si Ricardo sa dalaga, usa ka pinutos nga gamayng karton. Dihang giablihan kini ni Clarita nalipay kaayo ang dalaga. Unsa kahay gihatag ni Ricardo kang Clarita? Sa kalit mingutngot ang iyang kasingkasing kay nakita niya nga gihagkan ni Ricardo ang aping ni Clarita. Ha! Uyab na sila! Mao kini ang diha sa hunahuna ni Basilio. Dihay migilok nga mga luha sa iyang mga mata. Nakahilak siya. Ug karon nakahukom siya nga dili na lang gyud mopatim-aw pa sa balay nilang Clarita. Unsa may kapuslanan nga uyab na man sila si Clarita ug Ricardo?
Tulo na ka bulan nga wala na magpakita si Basilio sa balay nilang Clarita. Gitingob na lang niya ang iyang panahon sa pagpananggot. Mga tingog ra gyud sa tamsi, pirokpirok, tibalas, tikarol ug siloy ang kanunay niyang madungog sa kalubihan samtang siya namakgot sa bulok sa sanggutan didto sa itaas sa lubi. Unya may nakita siyang binuhat nga naglakaw nga napakakugang kaniya, si Clarita! Nganong ania siya? Unsa may iyang gianhi? Ug mibalik pagpitik ang iyang kasingkasing. Gihampak niya ang pitlagong sa sugong aron mahibalo si Clarita nga naa siya sa itaas sa sanggutan. Mihangad si Clarita ug nakita niya si Basilio.
Dihang nahikanaog na si Basilio gisugat siya ni Clarita.
“Hoy, Basilio, wala na lagi ka moadto’s balay? Ngano man? Nangluod ka? Basin baya’g nagtuo ka nga uyab ming Ricardo. Dili ha! Friends lang mi, uy! Friends lang!” Seryuso nga namulong ang dalaga.
“Unya nganong nagpahalok ka man ni Ricardo adtong may gihatag siyang regalo kanimo? Nakakita ko ato, uy!” ni Basilio nga mitutok kang Clarita.
“Ha? Kadto? Inigsuon ra tong iyang halok sa akong aping, uy!”
“Unya nganong mianhi ka man?” ni Basilio.
“Karong gabii adto sa balay, ha? Birthday nako. Adto baya, ha! Kon di ka moadto magmahay gyud ka!” ni Clarita.
Pagka taudtaod nananghid si Clarita nga molakaw na. Apan nakahangad siya sa sanggutan ni Basilio dihang miawit ang usa ka siloy.(KATAPUSAN)