WALA na maka-ipsot sa kamot sa kapulisan sa San Pedro Police Station ang upat ka mga menor de edad nga mga lalaki kinsa nakorner atol sa ilang paglungkab sa usa ka boutique sa Quirino Avenue, Barangay 3-A, Davao City kagahapon sa kaadlawon.
Sa Facebook sa netizen nga si Kenneth Howell Tuazon Nazareno, gipakita niya pinaagi sa video nga nagkumbitay sa kisami sa tindahan nga Love Styles nga daw damang kay buot niini nga molukso aron mosibat apan gipalibutan na sila sa mga tawo ug mga pulis hinungdan nga nasikop.
Subay sa impormasyon gikan sa Women and Childrens Protection Desk (WCPD) sa San Pedro PNP nga gisud sa upat ka menor de edad ang maong tindahan.
Dihang ila na kining nasulod, gibangagan pa nila ang dibisyon aron sudlon na sab ang laing upat pa ka tindahan.
Apan namatikdan sila sa usa ka guwardiya hinungdan nga nanawag kini og mga pulis.
Wa na sila miagi sa ilang unang giagian human giatangan na sila sa sekyu diin didto na sila miagi sa kisami sa Love Styles ug nagpakumbitay nga daw mga damang.
Ang mga nahisgutan mao sila alyas Reneboy, 10-anyos, Boboy, 13-anyos, Jerry 15-anyos, pulos nagpuyo sa Barangay Tibungco ug usa ka alyas Jay-ar 13-anyos, nagpuyo sa Matina Crossing.
Sa paspas nga pag-responde sa otoridad, wala na kasibat ang mga menor ug wala nila madala ang ilang buot pangkawaton sa maong mga establisyemento.
Gibutyag sab sa otoridad nga sa ilang pag-imbestiga sa maong mga bata, giadmitar nila nga ipalit nila og game cards ang ilang mga makawat aron gamiton sa online games.
Gipatawag na sa kapulisan ang ilang mga ginikanan ug gipailawom sa seminar sa WCPD labot sa pagpasagad sa ilang mga anak.