BAKANTE nga luna nga gipanag-iya sa dakong tindahan sa Barangay Pajo, Lapu-Lapu City libre nga ipagamit sa kagamhanan nga magsilbing terminal sa electronic jeep (e-jeep).
Magsilbi kining suporta sa Lapu-Lapu government sa katumanan sa programa sa nasudnong kagamhanan sa “modernization of public land transportation” diin gikatakda nga karong Biyernes, Pebrero 8, ilusad na ang E-jeep.
Gipahibawo ni Mayor Paz Radaza nga ang siyudad ug Gaisano Capital Mactan adunay kasabutan diin ang 3,000 metro kuwadrado nga bakante nga luna habig na sa Sangi New Road, Barangay Pajo ipagamit sa pribadong kompaniya nga libre sud sa 25 ka tuig base sa gikauyonan sa usufruct agreement.
Tungod niini, pahimuslan sa kagamhanan ang maong kahigayonan pinaagi sa paggamit sa maong luna isip terminal sa e-jeep diin mahimutang ang ilang charging station ug repair room sa maong solar powered jeep.
Nagkanayon ang mayor nga ang Star 8 Green Techonology Corp. nga supplier sa e-jeep maoy mangunay og taod sa mga charging station, pagbutang unya og qualified technician alang sa repair room sa bag-ong terminal.
Ang rota sa maong 23 seating capacity nga E-jeep molibot sa Mactan Circumferential Highways ug laing rota paingon ug pabalik sa lungsod sa Cordova. (FVQ)