GIINGONG hitman ni self-confessed drug lord Franz Sabalones ug ig-agaw sa prime suspect sa ambush ni Mayor Lakambini Reluya nasikop sa Criminal Investigation and Detection Group 7 (CIDG) 7 pinasikad sa warrant of arrest gikan sa korte.

Ang suspek mao si Jomar Labitad, taga sityo Crossing, Brgy. Campo 4, Dakbayan sa Talisay.

Ang pagsikop kaniya pinasikad sa warrant of arrest nga giluwatan ni Judge Glenda Go sa Regional Trial Court (RTC) Branch 65 sa siyudad sa Talisay.

Si Jomar nakuhaan og daghang mga armas sa dihang gironda ang iyang balay sa miaging tuig.

Matod ni Chief Inspector Lirio Coral, team leader sa CIDG 7, nga niadtong 2018, ilang gironda ang balay niini sa Campo 4 apan nakaikyas.

Ang amahan ang nadakpan ug napasakaan og kaso kay adunay daghang armas nga nakuha.

Apil siyang gikiha og illegal possession of firearms.

Giingong hitman usab siya ni Sabalones uban sa iyang ig-agaw nga si Jerome Labitad.

Apan gihimakak kini ni Jomar kay wala siya makaila niini.

“Construction worker ra tawon ko. Wala ko kaila anang Franz Sabalones uy,” matod ni Jomar sa mga tigbalita.

Giangkon hinuon niya sa interview sa Bombo Radyo nga paryente sila ni Jerome.

Gani, adunay usa ka higayon nga gisugo siya niini pagpahatod og shabu sa syudad sa Toledo.

Human niadto wala na siya mousab sa dihang gikasab-an siya sa iyang amahan nga nasayod sa iyang gihimo.

Reluya ambush

Tungod niini, ang Special Investigation Task Group Reluya makig-alayon sa CIDG-7 aron sutaon kon si Jomar aduna bay kasayuran sa pag ambush ni Mayor Lakambini Reluya.

Matod ni Sr. Supt. Manuel Abrugena, nga wa mogawas ang ngalan ni Jomar sa mga suspek sa pag ambush.

“Makikipag coordinate kami sa CIDG and we will be interviewing him. And titingnan din natin kung makakakuha tayo ng lead and ipapakita din natin yung larawan nitong si Jomar sa ating witness, baka po mamukhaan nya ito,” matod ni Abrugena.

Giangkon ni Supt. Marlu Conag, hepe sa Talisay City police station, nga wa malakip sa ilang target list si Jomar apan dako ang posibilidad nga nalambigit kini sa ubang krimen sa syudad.

Apan ang mga kabanay ni Jerome ang mipatim-aw sa Talisay police station ug mitug-an matod pa kini nga aduna silay mga paryente nga mga sakop kaniadto sa New People’s Army (NPA) nga nag lihok sa mga bukirang barangay sa syudad sa Talisay.

Nagduda si Abrugena nga silang Jerome ug Felix Abacajan naa ra sa bukid sa Talisay nag tago-tago nga gipanalipdan sa mga tawo nga suod na kanila.