MIRESULTA sa panagtabla (majority draw) ang away tali nila ni Ruther Del Castillo (6-8-4, 2KO) sa Ringside stable sa Manila batok Reil Mandate (2-1-1, 1KO) sa Omega stable-Mandaue sa 8-rounds fight sa main event sa “Rapid Fire...Binukbokay “ nga gidalit sa DTT events and promotions nga pinangulohan ni Dax Dacayana sa miaging gabii sa Tabunok Sports Complex, dakbayan sa Talisay.
Apan si Del Castillo diskontento sa resulta sa away bisan nga mipabor kaniya ang usa sa mga judges, 77-75, 76-76 ug 76-76 gumikan kay para niya siya ang midaug.
“Nagpasumbag nalang gani ko sa katapusang round kay klaro na kaayo ko nga daug ato pero gitabla man, gusto ko naay rematch aron makita kung kinsay daug gyud,” batbat ni Del Castillo sa Sun.Star Superbalita human sa away.
Sa iyang bahin si Mandate niingon nga niresulta sa panagtabla ang ilang gumikan iya nang kaluya ug namuypoy ang iyang mga kamot gumikan sa iyang ka gigil ug kaagresibo sa away.
“Kung may rematch nga mahitabo aw diha na nako ipakita kung unsaon nako siya pagpildi,” saysay ni Mandate nga lumad taga Libac, Sultan Kudarat.
Sa top supporting bout natabla usab ang debut fight ni Tiger Tyrus sa Siquijor kontra Jimmy Siscon sa Tisa, Cebu City. Midaug si Andy “Clever” Señeres sa Yanie Sta Cruz stable kontra Jerpol Valero.
Gipahunong sa referee ang away nila ni Memar “The Brave” Dula dihang iyang gi-TKO si Rey Villar 1:59 segundos sa 1st round. Midaug si Jeffrey “Kingkong” Segara batok ni Ariel Adan, gi-TKO sa ikaduhang hugna ni Sary “Kamikazi” Canonigosi Ervin Yamo sa Phil-Aust stable. Mipatugbabaw si Delmar “Guapito” Cabatas batok ni Dionilo Salvador Jr. (MD).
Sa 13 ka paresan sa mga amateur boxers, siyam ang midaug nga sakop sa TACABA-Talisay kontra sa mga Mandaue City based boxers.
Mihatag ug dugang kolor sa promotions mao ang boxing karambola sa upat ka mga bayot nga makaphugyaw sa mga boxing aficionados.
Gihatagan og certificate of appreciation ang duha ka mga sikat kaniadto nga boksingero nga sila si kanhi 1969 WBA flyweight king Bernabe “Billy” Villacampo ug kanhi world-rated boxer Ruben Rabago nga garbo sa Talsiay.
Lakip sa mga misaksi sa away mao ang mga ALA boys nga sila si AJ Banal, Milan Melindo, Michael Domingo, Jimrex Jaca, ALA Gym chief trainer Edito Villamor ug ALA Vice president on marketing Dennis Cañete.
Ang promosyon gisuportahan sa Tiger Beer, Nature Spring water, Red Moon, IPI ug Omega. (DQG)