NAPRESERBA ni Nonito “The Filipino Flash” Donaire ang puwersa ug dungog sa Pinoyng mga boksidor sa Pinoy Power 3/Latin Fury 13 pinaagi sa impresibong 3rd round knockout nga kadaugan batok kang Mexican Manuel “Chango” Vargas kagahapon sa Las Vegas Hilton.
Ningtabang kang Donaire sa pagbuhat sa ingon mao sila si Bernabe Concepcion ug ALA boy Mark Jason Melligen, kinsa pulos sab ningdaog sa ilang tagsatagsa ka away.
Apan dili tanan himaya ang naangkon sa mga Pinoy batok sa mga Latino nga kaatbang kay nangapilde sila si Gerry “Fearless” Penalosa ug Ciso Morales sa ilang tagsatagsa ka tahas.
Nilabyoglabyog sa wala ug tuo nga direksyon si Donaire aron makuha ang saktong tayming sa pagbuhi sa pampatay niyang wala nga uppercut nga maoy nagtumba kang Vargas sa nahabiling ika-1:40 minutos sa 3rd round.
Wala nakabangon si Vargas human sa 10 ka ihap sa referee ug nadepensaan ni Donaire ang iyang World Boxing Association (WBA) interim super flyweight title.
Si Donaire, kinsa nipadayag nga mosaka na siya’g timbang human ning awaya, misaka sa 23-1, 15 KOs nga rekord samtang si Vargas nahagbong sa 26-5-1, 11 KOs.
Ningsaksi sa away aron paghatag og suporta sa Pinoyng mga boksidor mao sila si pound-for-pound champion Manny Pacquiao ug ALA boy Z “The Dream” Gorres, kinsa naka-recover sa duha ka mayorihiyang operasyon sa utok.
Nanaog sab
Si Concepcion, kinsa usa sa mga boksidor nga gidumala ni Pacquiao, nakapuntos og 6th round knockdown aron paghimo’g agianan pinaagi sa dominante kaayong unanimous decision nga kadaugan batok kang Puerto Rican Mario “Principe Ponce” Santiago.
Dako kaayo’g labaw si Concepcion sa tulo ka judges, 98-91, 96-93, 97-92.
Ang kadaugan maoy naghatag kang Concepcion og kahigayunan sa pag-challenge sa makuyawng si WBO featherweight champion Puerto Rican Juan Manuel Lopez, kinsa personal nga nisaksi sa away.
Impresibo sab si Melligen sa iyang pagmugna og 6th round TKO nga kadaugan batok kang Raymond Gatica.
Nangapakyas
Labing sakit nga nasugatan sa mga Pinoy mao ang 1st round knockout nga kapildihan ni Morales sa iyang pag-challenge kang WBO bantamweight champion Fernando “Cochulito” Montiel.
Usa lang ka makusog nga left cross ni Montiel nga miigo sa bodega ang nagpatumba kang Morales, kinsa wala na nakabangon human sa 10 ka ihap sa referee.
Si Gorres mao gyud unta ang orihinal nga kontra ni Montiel sa usa ka rematch ning maong promosyon kon wala pa siya naoperahan sa utok human sa katapusan niyang away.
Kini nga away maoy usa gyud sa giatngtan ni Gorres tungod kay grabe ang iyang panghinaot nga modaog si Morales aron mabawsan ang iyang kontrobersyal nga desisyon nga kapildihan batok kang Montiel niadtong 2007.
Si Penalosa napilde sab ni Puerto Rican Eric “Little Hands of Steel” Eric Morel pinaagi sa split decision.
Midaog si Penalosa sa usa ka judge, 115-113, apan napilde sa duha, 115-113, 116-112.