NAKAMUGNA og paghuot sa trapiko sayo Huwebes sa buntag (Pebrero 7) pa lang diha sa may dalan gikan sa Panagdait padung sa M. Logarta street, sa Barangay Subangdaku, sa Dakbayan sa Mandaue, ang gitrabaho nga dalan padung pasaka sa fly-over.
Hinuon giklaro ni Glenn Antigua ang pangulo sa Traffic Enforcement Agency of Mandaue (TEAM) nga ang maong pagpa-semento sa approaching nga bahin sa flyover, nga kaniadto aspalto lang, proyekto sa Deparment of Public Works and Highways, human giingon nga aduna nay mga bangag-bangag ang aspalto niini.
Gisugdan ang pagpatrabaho niini, Myerkules sa gabii, Pebrero 6. Matud ni Antigua, nga ang gitug-an sa taga DPWH ngadto kanila nga su’d lang sa usa ka adlaw nga trabahuon kini. Apan tungod sa pipila ka kakulian, posibleng molanat pa kini hangtud sa Byernes tibuok adlaw, Pebrero 8.
Hinungdan nga ang mga sakyanan nga gikan sa Panagdait padung palabang sa M. Logarta ang gitugutan una nga makalahus og labang sa ubos sa flyover, hangtud nga mahimo na nga maagian ang usa ka lane sa flyover.
Dugang ni Antigua nga aron makatabang nga mamenusan ang paghuot sa trapiko, gikan sa duha lang ka mga sakop sa TEAM, gidungagan kini og upat ka mga traffic enforcer aron maoy makagiya sa mga motorista.
Gilauman kini nga sa Byernes sa gabii o Sabado sa buntag, Pebrero 9, maagian na sa mga sakyanan ang maong lane sa flyover.
“Nakapahibalo na nato daan ang taga DPWH ana, kay kinahanglan na sementohon, kay aspalto ra man na sya before, nya magsige daw og kaguba. Usa ka adlaw ra man unta ang ilang gipangayo nga pasirad-an ang usa ka lane sa flyover, pero ato tawagan, kay basin naa lang gamay nga kakulian, hinungdan naay oras ganiha buntag nga nakita sa publiko nga way nagtrabaho. Posible nga the same sa gipatuman karon ato ipatuman ugma, for the meantime, or basin gipauga nato ang gisemento, una paagian,” pagpasabot ni Antigua sa Superbalita Cebu.