GIKUMPIRMAR ni Police Superintendent Mardy Hortillosa, tigpamaba sa Cagayan de Oro City Police Office (Cocpo), nga matag police station adunay lain-laing istilo unsaon nila paghatag og seguridad sa mga simbahan nga ubos sa ilang area of responsibility.
Kini reaksyon sa pangutana kaniya nganong ang simbahan lamang sa cathedral ang adunay mga baggage area lakip ang paghatag og seguridad.
Apan matud niini nga tanan simbahan sa dakbayan sa Cagayan de Oro gihatagan gyod og seguridad sa kapolisan hilabina gayud panahon sa misa.
Ang Black Nazarene ang sirado ang entrance nga bahin ug sa gate moagi ang katawhan kon diin tinagsahon pagsusi ang mga bag nga dala. Wala man kini baggage counter tungod sa kaapiki sa gawas nga bahin apan anaay uniform personnel, polis, ug mga barangay tanod ang nakabantay sa gawas nga bahin.
Hangyo lang ni Hortillosa nga kung magsimba dili na modala og mga dagkong bag.
Taas gihapon kaayo ang alert level sa kapolisan labina wala pa nawala ang mga gakadawat nga mga hulga sa terorismo. (SVB)