DILI ikalimud nga adunay igong kaisug si Presidente Duterte sa pagpatuman sa iyang mga programa sa gobiyerno. Kini ang gitawag og political will. Sa pagtuman sa iyang gisaad sa kampanya nga hunongon ang illegal drugs adunay mga wala makagusto sa gitawag sa iyang mga kritiko nga extra-judicial killing. Iyang mga suod nga higala gitangtang tungod sa iyang kampanya sa kurapsiyon. Gisaway usab ang iyang desisyon nga pagpalubong kang anhing Pres. Ferdinand Marcos sa Libingan nga mga Bayani. Bisan gani ang iyang pagpasira sa Boracay aron kini malimpiyuhan nakusagat usab og pipila ka pagsaway. Apan karon gidayeg na ang kalimpiyo sa Boracay.
Apan angayan lang nga daygon, inay sawayon, si Pres. Duterte niining iyang pagpalimpiyo aron ma-rehabilitate ang Manila Bay. Ang kaniadto hugaw na kaayong dagat karon nakadani na og daghang mga tawo aron mosuroy ug mangaligo sa maong dapit. Suma sa DILG nga adunay 107 ka mga local government officials ang ilang pa-esplikahon kon nganong wala kini mopatuman sa balaud nga Ecological Solid Waste Management Act of 2001. Kadaghanan sa mga mayor ug barangay kapitan nanghatag og clearance ug buiding permit bisan kon walay sewerage system alang sa wastewater ang mi-apply. Mga 179 ka mga siyudad ug munisipyo ug 5,700 ka mga barangay nga nag-ambo sa Manila Bay.
Wala kini mahimo sa nanglabay nga mga presidente sa nasud ug local government units (LGUs). Kinahanglang ipadayon pa hinuon ang paglimpiyo tungod kay bisan og wala na kaayoy makita nga basura apan importanteng suta-on kon limpiyo na ba gayud ang tubig niini. Apan bisan kon wa pa mahingpit ang pag-rehabiltate sa maong bay angay lang nga atong daygon ang gihimo ni Digong inay sawayon tungod lang sa pamultika.
•••
Padayon ang masiao sa Small Town Lottery (STL). Gani anaa na usay 121 ka mga usher ug tellers sa masiao sa STL ang nadakpan. Nadugang kini sa kapin sa usa ka gatus nga nadakpan na niadtong miaging buwan. Kining STL maoy nagdugang og problema sa atong gobiyerno. Gimugna kini aron unta pagsumpo sa jueteng didto sa Luzon. Inay mahunong ang jueteng napun-an na hinuon kini og masiao sa STL. Samtang halos walay kita ang PCSO miburot pag-ayo ang nag-masiao nga STL. Sumala kang Cebu City Police Office Director Royina Garma nga adunay mga tellers ug ushers nga miangkon nga sakop sa Sinsilyo Corporation apan wala sa listahan nga gihatag sa PCSO ngadto sa kapulisan. Ang Sinsilyo Corporation maoy PCSO exclusive authorized agent dinhi sa Cebu City. Mao usab ang problema sa Saturn Gaming Corporation nga maoy exclusive STL agent sa PCSO sa lalawigan sa Cebu. Unsa pa may gihuwat sa PCSO nganong dili man nila sirhan ang STL dinhi sa Cebu?